Goa Municipality: सप्टेंबर महिना संपला आणि आता ऑक्टोबर महिना अर्ध्यावर आला, तरीही महापालिकेची मासिक बैठकीचे काही नियोजन होत नसल्याचे दिसत आहे. सत्ताधारी नगरसेवकांना त्याविषयी फारसे गांभीर्य नसले तरी विरोधी गटातील पाच नगरसेवकांची भूमिका ‘हाताची घडी आणि तोंडावर बोट'' अशीच असल्याचे दिसू लागले आहे.

शहरात करावयाच्या विकासकामांविषयी चर्चा, त्याचबरोबर प्रशासकीय निर्णय किंवा इतर महत्त्वाचे ठराव घेऊन ते पुढे कार्यान्वित करण्यासाठी नगरसेवकांची बैठक महत्त्वाची असते. सध्या महापालिकेसमोर काहीच विषय नाहीत का की सर्व विषय संपलेत, त्यामुळे बैठकीचा विषयच कोणी काढत नसल्याचे दिसत आहे.

सप्टेंबर महिन्यात महापालिकेची बैठकच झाली नाही, त्यामुळे ऑक्टोबरच्या पहिल्या आठवड्यात होईल, असे वाटत होते. परंतु आता ऑक्टोबरचे पंधरा दिवस होत आले तरी ही बैठकीविषयी काही चर्चा सुरू झाल्याचेही दिसत नाही. त्यामुळे स्थायी समिती सदस्य नक्की काय करतात, हाही प्रश्‍न आहे.

विरोधी गटातील नगरसेवकांना विचारणा केली असता, त्यांनी महापौरांना याबाबत विचारा असे सांगितले जाते. तर सत्ताधारी स्थायी समितीच्या सदस्यांनाही याबाबत काहीच माहिती नसल्याचे दिसते. काही आठवड्यांपूर्वी मंत्री बाबूश मोन्सेरात यांनी विकासकामांविषयी आढावा बैठक घेतली होती, त्यावेळी शहरातील अनेक विकासकामांचा लेखाजोखा पुढे आला होता.

त्यामुळे महापालिकेच्या बैठकीत हे विषय पुढे येतील असे वाटत होते. परंतु बैठक आता केव्हा होणार हे अद्याप निश्‍चित झालेले नाही. गाड्यांची संख्या वाढली असून शहरात सध्या अनेक ठिकाणी पाणीपुरीचे गाडे लावले जात असल्याचे चित्र आहे. यापूर्वी हटविलेल्या गाड्यांचा प्रश्‍न सुटलेला नाही. परंतु हे गाडे कोणाच्या परवानगी लागले, याची चर्चा सुरूआहे.

दहा दिवसांनंतर होईल बैठक

महापालिकेची बैठक होण्यास विलंब का, याविषयी विचारणा केली असता महापौर रोहित मोन्सेरात यांनी `गोमन्तक’ला सांगितले, दहा दिवसांनी ही बैठक होईल. अद्याप बैठकीचा अजेंडा तयार झालेला नाही, परंतु या महिन्यात ती होईल.