Goa Monsoon Update: सध्या सुरू असलेल्या मुसळधार पावसाने पणजीसह संपूर्ण राज्याला झोपडून काढले आहे. काही दिवसांपासून मंदावलेला पाऊस पुन्हा सक्रिय झाला असून राज्यात पावसाने 120 इंचाचा पल्ला ओलांडला आहे.

पश्‍चिम बंगालच्या उपसागरात कमी दाबाचा पट्टा निर्माण झाल्याने पुढील दोन दिवस राज्यात जोरदार पावसाची शक्यता वर्तविण्यात आली असून हवामान खात्याद्वारे ‘यलो अलर्ट’ जारी करण्यात आला आहे.

गेल्या 24 तासांत एकूण 19.8 मि.मी पावसाची नोंद झाली असून आतापर्यंत एकूण 3067 मि.मी म्हणजे 120.65 इंच पावसाची नोंद करण्यात आली आहे. राज्यात सरासरीच्या तुलनेत 4.2 टक्के अधिक पाऊस पडला आहे.

या आठवड्यात योग्य प्रमाणात पाऊस पडला नाही तर पिकांवर संकट ओढविण्याची शक्यता कृषी तज्ज्ञांनी वर्तविली होती. हा पाऊस शेतीसाठी, खासकरून भात शेतीस पोषक असल्याने शेतकऱ्यांसाठी चतुर्थी सण सुखवार्ता देणारा ठरला आहे.