Goa News: चार महिन्यापूर्वी मडगाव येथील होली स्पिरिट चर्चच्या मुख्य पाद्रीच्या कक्षात जाऊन कपाटात ठेवलेली दीड लाख रुपयांची रक्कम चोरण्याचा आरोप असलेल्या ॲलेक्स ऊर्फ सूर्या मेथ्यू (38) याला फातोर्डा पोलिसांनी सिकंदराबाद येथे अटक करून गोव्यात आणले.

काल त्याला मडगाव न्यायालयासमोर हजर केले असता त्याला 8 दिवसांच्या पोलीस कोठडीचा रिमांड देण्यात आला. पोलिसांनी या प्रकरणी तपास चालू ठेवला होता. सदर चोरटा सिकंदराबाद येथे रहात असल्याची माहिती मिळाल्यावर फातोर्डा पोलिस स्थानकाचे हवालदार निलेश कासकर व विल्टन रिबेलो यांनी त्याला तेलंगणा राज्यात जाऊन अटक केली.

अटक केलेला मेथ्यू हा अट्टल चोरटा असून त्याने अन्य काही राज्यातही अशाच चोऱ्या केल्याची माहिती असून त्याला त्या चोऱ्या प्रकरणी यापूर्वी अटकही झाली होती. या चोरट्याकडून पोलिसांनी 53,500 रूपये रोख जप्त केली आहे. या प्रकरणी पोलिस निरीक्षक गिरेंद्र नाईक पुढील तपास करत आहेत.