Goa: काणका बांध येथील आत्माराम गडेकर यांनी म्हापसा (Mapusa) येथील कार्व्हाल्हो पेट्रोल पंपनजीक उभारलेले बेकायदा भव्य व्यापारी संकुल (Illegal Commercial building) सीलबंद करण्याचा आदेश म्हापसा पालिकेचे मुख्याधिकारी क्लेन मदेरा (Mapusa Municipality Chief officer Clein Madera) यांनी दिला आहे.

सामाजिक कार्यकर्ता जवाहरलाल शेट्ये यांनी सातत्याने केलेल्या तक्रारी व पाठपुराव्यानंतर हा आदेश जारी करण्यात आला आहे. या संकुलासंदर्भात शासकीय यंत्रणांकडून यथायोग्य परवाने न घेण्यात आल्याने हा आदेश जारी करण्यात आल्याचे मुख्याधिकाऱ्यांनी आदेशपत्रात नमूद केले आहे.

तक्रारींना अनुसरून म्हापसा पालिकेने या संकुलाची पाहणी केली असता त्या ठिकाणी अवैधरीत्या व्यवसाय चालत असल्याचे निदर्शनास आले होते. पालिकेने आणि उत्तर गोवा नियोजन व विकास प्राधिकरणानेही त्या संकुलाला परवाना अथवा ‘ना हरकत दाखला’ दिला नाही, हे चौकशीअंती सिद्ध झाले.

तसेच गोवा पालिका अधिनियमांखाली आवश्यक असलेले अन्य परवानेही गडेकर यांनी मिळवले नव्हते.यासंदर्भात पालिकेने गडेकर यांना ते व्यापारी संकुल पाडण्यासंदर्भात कारणे दाखवा नोटीस बजावून कायदेशीर कागदपत्रे सादर करण्यास कळवले होते; तथापि, त्या बाबतीत त्यांना अपयश आले होते.


सर्व व्यवहार बंदचा आदेश

व्यापारी संकुलातील सर्व व्यवहार बंद करण्याचे आदेश मुख्याधिकाऱ्यांनी दिले आहेत. तसेच, या संकुलाला सील ठोकण्याचे आदेश त्यांनी पालिकेचे निरीक्षक विकास कांबळे आणि शेखर गावस यांना दिले आहेत. त्यांनी त्या संकुलातील सर्व साहित्य १ नोव्हेंबर रोजी दुपारी २ वाजता जप्त करून त्यासंदर्भातील कार्यवाही अहवाल आपणांस सादर करावा, असेही त्या आदेशपत्रात नमूद करण्यात आले आहे.