मांद्रे: मांद्रेतील सावंतवाडा परिसरात शनिवारी दुपारी गव्याच्या हल्ल्यात एक वृद्ध शेतकरी गंभीर जखमी झाला. काजूच्या बागेत कामासाठी गेलेल्या या शेतकऱ्यावर अचानक गव्याने झडप घातल्याने परिसरात भीतीचे वातावरण पसरले आहे.

काजू बागेत हल्ला

सावंतवाडा येथील ६५ वर्षीय शेतकरी नेहमीप्रमाणे शनिवारी दुपारी १ च्या सुमारास आपल्या काजूच्या बागेत कामासाठी गेले होते. यावेळी झुडपात दबा धरून बसलेल्या एका गव्याने त्यांच्यावर अचानक हल्ला केला. गव्याच्या धडकेत शेतकरी गंभीररीत्या जखमी झाले.

जखमी शेतकऱ्याला तातडीने रुग्णालयात नेण्यासाठी १०८ रुग्णवाहिकेला पाचारण करण्यात आले होते. मात्र, ग्रामस्थांच्या म्हणण्यानुसार, रुग्णवाहिका घटनास्थळी पोहोचण्यास बराच उशीर झाला.

त्यांना प्रथम उत्तर गोवा जिल्हा रुग्णालयात नेण्यात आले, परंतु जखमांचे गांभीर्य पाहून डॉक्टरांनी त्यांना तातडीने बांबोळी येथील गोवा वैद्यकीय महाविद्यालयात (GMC) हलवण्याचा सल्ला दिला. सध्या त्यांच्यावर जीएमसीमध्ये उपचार सुरू आहेत.

ग्रामस्थांचा संताप

या घटनेनंतर मांद्रे आणि सावंतवाडा परिसरातील ग्रामस्थांनी तीव्र संताप व्यक्त केला आहे. वन्यप्राण्यांचा मानवी वस्तीतील आणि शेतीमधील वावर मोठ्या प्रमाणावर वाढला असून, वन विभागाने याकडे लक्ष देण्याची मागणी होत आहे. ग्रामस्थांनी वन्यप्राण्यांच्या घुसखोरीवर कायमस्वरूपी उपाययोजना करण्याची मागणी केली आहे.