कोल्हापूर: फेब्रुवारीच्या पहिल्याच दिवशी कोल्हापुरात गोवा बनावटीचे पाच लाख रुपये किंमतीचे मद्य जप्त करण्यात आले. दरम्यान, सलग दुसऱ्या दिवशी देखील मोठ्या प्रमाणावर मद्यसाठा जप्त करण्यात आलाय.

उत्पादन शुल्क विभागाच्या वतीने ०२ फेब्रुवारी रोजी घटप्रभा नदीच्या पुलाजवळ ही कारवाई करण्यात आली. याप्रकरणी बेळगावातील एकाला अटक केली आहे.

जोतिबा जीवनाप्पा भोगण (वय ३१, रा. गणपती गल्ली, बेकीनकेरी, ता. हुक्केरी, बेळगाव ) असे अटक करण्यात आलेल्या संशयिताचे नाव आहे.

त्याच्याकडून गोल्डन एस ब्ल्यू फाईन व्हिस्की १८० मिलीच्या ११०४ सिलबंद बाटल्या आणि ७५० मिलीच्या १९२ बाटल्या असा एकूण दोन लाख ५० हजार ५६० रुपये किंमतीचा मुद्देमाल जप्त करण्यात आला आहे.

उत्पादन शुल्क गडहिंग्लज विभागाच्या वतीने प्रसिद्ध करण्यात आलेल्या प्रसिद्धी पत्रकानुसार, संशयित आरोपी जोतिबा याने मोठ्या प्रमाणावर मद्यसाठा जवळ बाळगला असल्याची गुप्त माहिती विभागाच्या अधिकाऱ्यांना मिळाली.

अधिकाऱ्यांनी मिळालेल्या माहितीच्या आधारे तारेवाडी गावच्या हद्दीत, घटप्रभा नदीच्या पुलाजवळ जाऊन तपासणी केली असता. संशयित जोतिबाच्या ताब्यात मोठ्या प्रमाणावर मद्यसाठा आढळून आला. अधिकाऱ्यांनी मद्यसाठा जप्त केला आहे.

संशयिताविरोधात महाराष्ट्र दारुबंदी अधिनियम १९४९ चे कलम ६५ (ई) ९० नुसार गुन्हा नोंद केला आहे. दरम्यान, कोल्हापूरमार्गे गोव्यातून येणाऱ्या मोठ्या प्रमाणावर मद्याची तस्करी केली जाते.

गोव्यातून महाराष्ट्रात येण्यासाठी विविध मार्गांचा अवलंब करुन तस्करी केली जाते. गोवा बनावटीचे मद्य महाराष्ट्रात विक्री करण्यास मनाई आहे.