Goa Fatal Accident: शिरदोन येथे दुचाकीला भरधाव कारची धडक, ज्येष्ठ नागरिकाचा मृत्यू

पणजी: भरधाव कारने दुचाकीला दिलेल्या धडकेत ६६ वर्षीय ज्येष्ठ नागिकाचा मृत्यू झाला आहे. शिरदोन जुन्या पुलावर रविवारी (०२ फेब्रुवारी) सकाळी सहा ते साडे सहाच्या सुमारास हा अपघात झाला. याप्रकरणी आगशी पोलिसांनी ३३ वर्षीय कार चालकाला अटक केली नंतर त्याची जामीनावर सुटका करण्यात आली.

आलेक्स वेल्स (वय ६६, रा. आगशी) असे या अपघातात मृत्यू झालेल्या व्यक्तीचे नाव आहे. याप्रकरणी आगशी पोलिस स्थानकात या अपघाताची तक्रार नोंद करण्यात आली आहे.

पोलिसांकडून मिळालेल्या माहितीनुसार, आलेक्स गोवा वेल्हा येथून बांबोळीच्या दिशेने निघाले असता समोरुन भरधाव वेगात येणाऱ्या चारचाकीने दुचाकीला जोराची धडक दिली. शिरदोन जुन्या पुलावर हा अपघात घडला. अपघातात आलेक्स गंभीर जखमी झाले. आलेक्स यांना उपचारासाठी गोवा वैद्यकीय महाविद्यालयात दाखल करण्यात आले पण, त्यांना डॉक्टरांनी मृत घोषित केले.

याप्रकरणी पोलिसांनी संशयित ३३ वर्षीय कार चालकाला अटक केली पण, नंतर कार चालकाची जामीनावर सुटका करण्यात आली. दीपिका पारवार या प्रकरणाचा अधिक तपास करतायेत.