LPG Availability Goa  : राज्यात सध्या पुढील 15 दिवस पुरेल इतका गॅस सिलिंडरचा साठा उपलब्ध आहे. प्रत्येक राज्यातील उपलब्ध साठ्याची माहिती केंद्र सरकारने मागितली असून त्याबाबतचा अहवाल आजच (11 मार्च) केंद्राला पाठवून देण्यात येणार आहे. केंद्राच्या निर्देशांनुसार पुढील निर्णय घेण्यात येईल, असे मुख्यमंत्री डॉ. प्रमोद सावंत यांनी विधानसभा सभागृहात बोलताना सांगितले.

आमदार केदार नाईक यांनी शून्य प्रहराला याबाबतचा प्रश्न विचारला होता. राज्यात सध्या गॅस सिलिंडरचा मोठ्या प्रभागात तुटवडा भासत आहे. गॅस एजन्सींना व्यावसायिक आस्थापनांना सिलिंडर न देण्याचे निर्देश दिलेले आहेत. त्याचा फटका व्यावसायिक आस्थापनांना बसत असून, राज्य सरकारने तत्काळ याबाबत तोडगा काढावा, अशी मागणी त्यांनी केली होती. यावर बोलताना मुख्यमंत्र्यांनी सांगितले की, गॅस सिलिंडरच्या एजन्सींनी सिलिंडर व्यावसायिक ग्राहकांना देऊ नये असे परिपत्रक मंगळवारी जारी केलेले आहे. याबाबत आपण पेट्रोलियम मंत्री हरदीप सिंग पुरी यांच्याशीही चर्चा केलेली आहे.

उपायांसाठी तीन सचिवांची समिती स्थापन

राज्यांमधील सिलिंडरच्या साठ्याची माहिती घेऊन पुढील उपाययोजना करण्यासाठी तीन सचिवांची समिती स्थापन केलेली आहे. गोव्यातील (Goa) सध्याच्या साठ्यासंदर्भातील अहवाल या समितीला पाठवण्यात येईल. त्यानंतर केंद्राच्या निर्देशांनुसार पुढील निर्णय घेतला जाईल, असेही मुख्यमंत्री सावंत यांनी सांगितले.