पणजी: ‘एलआयसी’च्या पेन्शन आणि ग्रुप स्कीम विभागात कार्यरत असलेले प्रशासकीय अधिकारी गजेंद्रनाथ रतनबोली यांनी ४३.८० लाख रुपयांचा आर्थिक गैरव्यवहार केल्याप्रकरणी केंद्रीय गुन्हे अन्वेषण विभागाच्या (सीबीआय) लाचलुचपत प्रतिबंधक विभागाने गुन्हा दाखल केला आहे.

तपासात समोर आलेल्या माहितीनुसार, जुलै २०२३ ते जानेवारी २०२४ या कालावधीत सात वेगवेगळ्या आर्थिक व्यवहारांद्वारे या रकमेचा अपहार करण्यात आला. या व्यवहारांमध्ये काही त्रयस्थ व्यक्तींच्या खात्यांचा वापर करून निधी वळवण्यात आला आणि नंतर ती रक्कम रतनबोली यांच्या खात्यात वर्ग करण्यात आल्याचे दिसून आले.

या प्रकरणात एका स्थानिक व्यापाऱ्यासह काही अज्ञात व्यक्तींनाही आरोपी केले आहे. हे व्यवहार लक्षात आल्यानंतर तिघा लाभार्थ्यांनी त्यांच्या खात्यात जमा झालेली रक्कम ‘एलआयसी’कडे परत केली. तरीही संस्थेचे सुमारे ३० लाख रुपयांचे नुकसान झाले आहे.

सीबीआयने दाखल केलेल्या एफआयआरनुसार, आरोपी अधिकाऱ्याने गैरव्यवहार लपवण्यासाठी एलआयसीची नोंद असलेली वही आणि कागदपत्रे नष्ट करण्याचा प्रयत्न केला होता. फसवणूक, पदाचा गैरवापर, विश्वासभंग आणि पुरावे नष्ट करण्याचे प्रयत्न आदी आरोपांखाली भारतीय दंड विधानाच्या विविध कलमांनुसार आणि भ्रष्टाचार प्रतिबंधक कायद्यानुसार गुन्हा दाखल करण्यात आला आहे.दरम्यान, या प्रकरणाचा अधिक तपास सुरू असल्याचे पोलिस अधिकाऱ्यांनी सांगितले.