Panaji Municipal Corporation

पणजी: टोंक-करंजाळे येथे ज्योएल बारच्या शेजारी आणि रस्त्याच्या बाजूला असलेल्या अतिक्रमण करून बेकायदा व्यवसाय करणाऱ्या चार दुकानांवर महानगरपालिकेने कारवाईचा बडगा उगारला. राजकीय वरदहस्तामुळे या अतिक्रमणाकडे कानाडोळा होत होता, परंतु अखेर महानगरपालिकेला या अतिक्रमणावर हातोडा मारावा लागला.

महानगरपालिकेला ही कारवाई करताना पोलिसांचा बंदोबस्त घ्यावा लागला. जेसीबी, कर्मचाऱ्यांचा ताफा ही अतिक्रमणे हटविण्यासाठी कार्यरत होता. सकाळी पावणेबाराच्या सुमारास अतिक्रमण (Encroachment) हटवण्यास सुरवात झाली. दुकानगाळ्यांसमोर दुकाने थाटून व्यवसाय चालला होता. महानगरपालिकेने कोणतीही नोटीस बजावली नसताना थेट कारवाई केल्याचे दुकानमालकांचे म्हणणे आहे. तिसवाडी मामलेदार, महानगरपालिकेचे अकाऊंट अधिकारी थॉमस, निरीक्षक दीपक सातार्डेकर व पालिका कर्मचाऱ्यांचा ताफा कारवाईत होता. ज्यांचे घर व दुकान पाडण्यात आले, त्यांचे १९८१ पासून आपले घर आहे, पण आत्तापर्यंत कोणतीही नोटीस बजावलेली नाही, तरीही कारवाई करण्यात आली, असे म्हणणे आहे.

चार दुकाने पाडण्याची कारवाई करताना कर्मचाऱ्यांनी सर्व साहित्य बाजूला काढले आणि त्यानंतर काही बांधकाम होते, ते जेसीबीच्या साह्याने पाडण्यात आले. दुकानावरील पत्रे व इतर अतिक्रमित साहित्य कामगारांनी हटविले.

पूर्व कल्पना न दिल्याचा आरोप

वाहनांचे पंक्चर काढण्याचे दुकान, त्याचबरोबर किराना-स्टेशनरी व वाईन विक्रीचे दुकान या ठिकाणी होते. सिलीर आल्मेदा या कुटुंबातर्फे हे व्यवसाय सुरू होते. कुटुंबांच्या सदस्यांकडून महानगरपालिकेच्या कारवाईला अजिबात विरोध झाला नाही. त्यांनी अतिक्रमण काढू दिले, परंतु त्यानंतर महानगरपालिकेच्या अधिकाऱ्यांना अतिक्रमण असल्याची आम्हाला कोणतीही नोटीस बजावली नाही. आम्ही अधिकाऱ्यांकडे नोटीस मागितली, तर तीही त्यांनी दाखवली नाही, असा आरोप केला.