भाजपने सत्तेवर येण्यापूर्वी प्रचारादरम्यान मोफत तीन गॅस सिलिंडरची घोषणा केली होती. मात्र, सरकारला एक वर्ष पूर्ण होण्यापूर्वीच ही घोषणा रद्द (स्क्रॅप) झाल्यातच जमा आहे, असा आरोप गोवा फॉरवर्डचे आमदार विजय सरदेसाई यांनी सरकारवर करत या योजनेवर प्रश्नचिन्ह उपस्थित केले.

विधानसभा निवडणुकीच्या तोंडावर भाजपने ‘संकल्पपत्र’ नावाने आपला जाहीरनामा 8 फेब्रुवारी 2022 रोजी केंद्रीय नेत्यांच्या उपस्थितीत जाहीर केला होता. सत्तेवर आल्यावर मुख्यमंत्री प्रमोद सावंत यांनी आपल्या पहिल्या अर्थसंकल्पात ‘गोवा ग्रामीण ऊर्जा योजने’अंतर्गत गोमंतकीयांना तीन गॅस सिलिंडर मोफत दिले जातील असे सांगून 40 कोटी रुपयांची तरतूद केली.

त्यासंबंधीची फाईल तयार होऊन 26 जून 2022 रोजी मुख्यमंत्र्यांच्या कार्यालयात पोहोचली. त्यावर मुख्यमंत्र्यांनी चार महिन्यांनी सही करून सदर फाईल अर्थ खात्याकडे पाठवली. यावर खात्याच्या सचिवांनी महागाईचा कमी झालेला दर आणि प्रत्येक महिलेला गृहआधार योजनेतून दिले जाणारे दीड हजार रुपयांचे कारण पुढे करून ही योजना रद्द करण्याची सूचना 13 डिसेंबर 2022 रोजी केली.

त्‍यावर विजय सरदेसाई यांनी आज प्रश्न उपस्थित करत ‘ज्या आयाबहिणींच्या जीवावर आपण निवडून आलात त्यांना आपले उत्तर काय?’ असा थेट सवाल करत सरकारला घेरले.