Yuri Alemao: मुख्यमंत्री डॉ. प्रमोद सावंत यांनी 21 डिसेंबर 2023 रोजी झालेल्या मंत्रिमंडळ बैठकीनंतर आठव्या गोवा विधानसभेच्या सहाव्या अधिवेशनाचा कालावधी कामकाज सल्लागार समिती (बीएसी) ठरवेल, असे विधान केले होते. यावर विरोधी पक्ष नेते युरी आलेमाव स्पष्टीकरण देत त्यांचे विधान खोडून काढले आहे.

'बीएसी कोणत्याही सत्राच्या एकूण कालावधीवर निर्णय घेत नाही आणि विशिष्ट सत्राच्या कामकाजाचे दिवस सरकारच ठरवीते,' असे स्पष्टीकरण देत सभापतीना लिहीलेल्या पत्रातून विरोधी पक्षनेते युरी आलेमाव यांनी मुख्यमंत्र्यांचा दावा खोडून काढला.

'कामकाज सल्लागार समितीच्या आजच्या बैठकीवेळी सादर केलेल्या पत्रात विरोधी पक्षनेते युरी आलेमाव यांनी गोवा विधानसभेच्या कार्यपद्धती आणि कामकाज नियम 196 अंतर्गत कामकाज सल्लागार समितीची जबाबदारी कामाकाजासाठी वेळेची शिफारस करण्यापुरती मर्यादित आहे.

विधानसभेच्या अधिवेशनादरम्यान विविध कामकाजाचा कालावधी आणि वेळापत्रक सूचित करणे एवढेच समिती करते असे नमूद केले आहे.

तसेच सरकारने विधेयकांचा अभ्यास करण्यासाठी विधानसभेच्या सदस्यांना वाजवी वेळ द्यावा. विधेयके सादर करणे, विचार करणे हे सभागृहात योग्य चर्चेने झाले पाहिजे', असे युरी आलेमाव यांनी आपल्या पत्रात नमूद केले आहे.

विरोधी पक्ष आणि सत्ताधाऱ्यांच्या तारांकीत प्रश्नांच्या यादीसाठी एकत्रीत चिठ्ठ्या काढण्याचा ह्या अधिवेशनापासून केलेल्या बदलावरही त्यांनी आक्षेप घेत पूर्वीचीच पद्धत चालू ठेवावी अशी मागणीही त्यांनी केली आहे.