भाजपने लोकसभा निवडणुकीच्या प्रचाराचे रणशिंग फुंकले आहे. सांसद प्रचार मोहिमेअंतर्गत केंद्रीय गृहमंत्री अमित शहा आज गोवा दौऱ्यावर असून शहा यांचे दुपारी दाबोळी विमानतळावर आगमन झाले आहे. फर्मागुढी-फोंडा येथे दुपारी 4 वाजता अमित शहा यांची जाहीर सभा होणार आहे.

दरम्यान अमित शहा यांच्या गोवा दौऱ्यावरुन भाजप सरकारवर विरोधकांनी टिकास्त्र सोडले आहे. लोकसभा निवडणुकीसाठी फर्मागुढी येथे भाजपची पहिलीच जाहीर सभा होत असून यात राज्यातील दोन्हीही मतदारसंघांतील कार्यकर्ते मोठ्या संख्येने सभेला येणार आहेत.

गोवा फॉरवर्डचे सरचिटणीस दुर्गादास कामत यांनी शहा यांच्या गोवा दौऱ्यावरुन गोव्यातील भाजप सरकारवर टिका केली आहे. केंद्रीय मंत्र्यांंच्या दौऱ्यामुळे राज्यातील कामे सरकार प्राधान्याने हाती घेणार असेल तर मंत्र्यांनी भेट देत रहावी अशी टिका केली आहे.

दुर्गादास कामत म्हणाले, "केंद्रीय गृहमंत्री अमित शहा यांच्या गोवा राज्याच्या दौऱ्या निमित्त फार्मगुडी सर्कल येथे प्रशासनाच्या वतीने जलद गतीने रस्त्याचे डांबरीकरण करण्यात आले. त्यामुळे केंद्रीय मंत्र्यांनी दर आठवड्याला गोवा राज्याला भेट देत राहावी जेणेकरून डॉ. प्रमोद सावंत यांच्या नेतृत्वाखालील सरकार प्राधान्याने कामे हाती घेईल त्यामुळे नागरिकांना दिलासा मिळेल" अशी टिका कामत यांनी सावंत सरकारवर केली.

काँग्रेसचे माध्यम विभाग प्रमुख अमरनाथ पणजीकर यांनी शहा यांच्या गोवा दौऱ्यावरुन गोव्यातील भाजपला सवाल केला आहे. शहा यांच्या सभेत मला एक मिनिट बोलू दिले पाहिजे. भाजपा प्रदेशाध्यक्ष सदानंद तानावडे आणि गोव्याचे मुख्यमंत्री डॉ. सावंत हे करू शकतात का? असा सवाल पणजीकर यांनी भाजपला केला आहे.

"मी भाजप नेते अमित शाह यांच्या सभेला उपस्थित राहण्यास तयार आहे. "माझी आई म्हादई" या एका विषयावर मला अमित शाह यांच्या उपस्थितीत एक मिनिटे बोलू दिले पाहिजे. भाजपा प्रदेशाध्यक्ष सदानंद तानावडे आणि गोव्याचे मुख्यमंत्री डॉ. सावंत हे करू शकतात का? असा सवाल अमरनाथ पणजीकर यांनी भाजपला केला आहे.