मडगाव: युतीबाबत काँग्रेस पक्षाकडून आवश्‍‍यक तसा प्रतिसाद मिळत नसल्‍याने गोवा फॉरवर्ड आणि आम आदमी पार्टी या दोन्‍ही पक्षांनी पर्यायी युती करण्‍याचा निर्णय घेतला असून यासंदर्भात या दोन्‍ही पक्षांच्‍या नेत्‍यांमध्‍ये बोलणीही सुरू झाली आहेत. रविवारी गोवा फॉरवर्डचे अध्‍यक्ष विजय सरदेसाई आणि आम आदमी पक्षाचे बाणावलीचे आमदार व्हेन्झी व्‍हिएगस हे मडगावात एका व्‍यासपीठावर एकत्र आले होते.

या गोष्‍टीकडे युतीबाबतचा संकेत यादृष्‍टीने पाहिले जात आहे. आम आदमी पार्टीचे गोवा प्रदेशाध्‍यक्ष वाल्‍मिकी नाईक आणि गोवा फॉरवर्ड पार्टीचे अध्‍यक्ष विजय सरदेसाई या दोघांनीही भाजपला हरविण्‍यासाठी विरोधी पक्षांची युती हे आपले धोरण असल्‍याचे सांगितले. आम्‍ही सगळ्‍यांनाच बरोबर घेऊन जाण्‍याचा प्रयत्‍न करत आहोत. मात्र, काँग्रेसकडून आम्‍हाला अपेक्षित असा प्रतिसाद मिळत नाही, अशा प्रतिक्रिया त्‍यांनी व्‍यक्‍त केल्‍या.

काँग्रेसकडून अधिकृत संदेश नाही!

‘आप’चे गोवा प्रदेशाध्‍यक्ष वाल्‍मिकी नाईक यांना विचारले असता, आमची सगळ्‍याच विराेधी पक्षांकडे बोलणी सुरू आहेत. मात्र, काँग्रेसकडून याबाबत आम्‍हाला अजूनही अधिकृत संदेश आलेला नाही. काँग्रेसने ‘आरजी’ला तसे पत्र पाठविले, अशाप्रकारचे कुठलेही पत्र आम्‍हाला पाठविलेले नाही. उलट त्‍यांचे आमदार आपण वेळ्‍ळीतून निवडणूक लढविणार, अशी घोषणा करत आहेत. काँग्रेसकडून अजूनही आम्‍हाला सकारात्‍मक प्रतिसाद मिळालेला नाही, असे सांगितले.

जनतेला जे हवे तेच घडेल!

विजय सरदेसाई यांना सोमवारी पणजी येथे युतीबाबत विचारले असता, ‘गोव्यातील जनतेला जे हवे आहे ते नक्कीच घडेल. मलाही असे वाटते की हे लवकर व्हायला हवे. कसेही करून, एका किंवा दुसऱ्या मार्गाने युती होईलच,’ असे त्यांनी सांगितले. काँग्रेसशी युतीबाबत काही चर्चा झाली का, असे विचारले असता, युतीबाबतची चर्चा सध्या थांबलेली असल्याचे त्यांनी स्पष्ट केले.