पणजी: सरकारने राज्यात कृत्रिम बुद्धिमत्तेवर (एआय) आधारित वाहतूक देखरेख आणि ऑनलाइन ई-चलन प्रणाली अधिकृतपणे सुरू केल्याला २४ तास देखील उलटले नाहीत आणि सायबर गुन्हेगारांनी जनतेच्या अनभिज्ञतेचा गैरफायदा घेण्यास सुरुवात केली आहे.

अधिकृत ‘आरटीओ ई-चलन’ ॲप्लिकेशन असल्याचे भासवून व्हॉट्स ॲपवर एक घातक ‘एपिके’ फाईल मोठ्या प्रमाणात पाठविली जात आहे. ही फाईल उघडल्यावर मोबाईल हॅक होऊन बंद पडतो आणि मोबाईलचे संपूर्ण नियंत्रण हॅकरकडे जाते.

राज्यातील काही स्थानिक पोलिस ठाण्यांमध्ये अशा स्वरूपाच्या तक्रारी दाखल झाल्याची माहिती मिळाली आहे. ‘आरटीओ ई-चलन एपिके’ (आकार : ६.३ एमबी) नावाच्या या फसव्या फाईल्स व्हॉट्स ॲप मेसेजद्वारे पाठवल्या जात आहेत.

सरकारी मोहिमेचा गैरफायदा

१६ जुलै रोजी गोवा सरकारने वाहतूक नियमांचे उल्लंघन करणाऱ्यांना थेट ऑनलाईन पोर्टल आणि एसएमएसद्वारे ई-चलन पाठवण्यासाठी एआय कॅमेरा नेटवर्क सक्रिय केले होते. वाहतूक शिस्त आणि पारदर्शकतेसाठी हे पाऊल उचलले आहे.

परंतु, सायबर चोरांनी याच घोषणेचा गैरफायदा घेत हुबेहूब सरकारी प्रक्रियेसारखे दिसणारे बनावट ॲप तयार केले. दंडाच्या भीतीपोटी आणि तांत्रिक माहितीच्या अभावामुळे नागरिक या जाळ्यात सहज अडकत आहेत.