पेडणे : न्हयबाग येथील तपासणी नाक्यावर अबकारी विभागाने २८ रोजी रात्री ९.३० वाजता महाराष्ट्रात बेकायदेशीररीत्या वाहतूक करण्यात येणारी ३ लाख ७८ हजार ९०० रुपये किमतीची दारू जप्त केली.

जप्त केलेल्या दारूमध्ये व्हिस्की व रमचा समावेश आहे. तसेच १५ लाख रुपये किमतीचा एमएच-४५-एएक्स-३७०६ क्रमांकाचा ट्रकही ताब्यात घेण्यात आला. न्हयबाग येथील तपासणी नाक्यावर ट्रक थांबविल्यानंतर अबकारी कर्मचाऱ्यांनी चालकाकडे चौकशी केली.

त्यावेळी ट्रकमध्ये भाताचा कोंडा असून तो पुण्याला घेऊन जात असल्याचे चालकाने सांगितले. उपनिरीक्षक लक्षदीप कुंकळकर व हवालदार बिंदेश पेडणेकर यांनी ट्रकची तपासणी केली असता, ट्रकमध्ये भाताचा कोंड्याच्या पोत्यांमागे दारूचे खोके लपवल्याचे आढळून आले.

ट्रकचालक ज्ञानेश्वर धर्मा उन्हाळे (रा. सोलापूर) यालाही ताब्यात घेण्यात आले आहे.पेडणे अबकारी कार्यालयाचे निरीक्षक विक्रांत कोरगावकर व सलील वळवईकर यांच्या मार्गदर्शनाखाली ही कारवाई करण्यात आली.