पणजी: राज्यातील एका बँक फसवणुकीच्या प्रकरणात सक्तवसुली संचालनालयाने (ईडी) मोठी कारवाई करत क्राऊन मिनरल्स ट्रेडिंग कॉर्पोरेशन कंपनी आणि तिच्या भागीदारांची दक्षिण गोव्यातील २.८६ कोटींहून अधिक किमतीची स्थावर मालमत्ता जप्त केली आहे.

या जप्तीत एक अलिशान निवासी व्हिला आणि एकापेक्षा अधिक प्लॉट्सचा समावेश असल्याची माहिती मिळाली आहे. ‘ईडी’ने जारी केलेल्या निवेदनानुसार, ‘सीबीआय’च्या भ्रष्टाचार प्रतिबंधक शाखेने नोंदवलेल्या प्राथमिक गुन्हा नोंदीवर आधारित ही कारवाई करण्यात आली आहे.

या एफआयआरमध्ये, कंपनी आणि भागीदार यांनी बँकेकडून तब्बल ७ कोटींचे कर्ज फसवणूक करून मिळविले असल्याचा गंभीर आरोप आहे. जप्त केलेल्या संपत्तीत दक्षिण गोव्यातील एक निवासी व्हिला तसेच अनेक भूखंडांचा समावेश असून त्याची एकत्रित किंमत २.८६ कोटी एवढी आहे.

‘ईडी’कडून या प्रकरणी मनी लॉन्डरिंग प्रतिबंधक कायदा २००२ अंतर्गत स्वतंत्र गुन्हा नोंदवण्यात आला आहे. पुढील तपासात आणखी मालमत्ता व आर्थिक व्यवहारांचा मागोवा घेतला जाणार असल्याचेही सूचित केले.

मनी लॉन्डरिंगचा संशय

मिळालेल्या माहितीनुसार, संशयितांनी बँकेला गहाण म्हणून दाखवलेली जमीन आणि इतर मालमत्ता आधीच विविध बँकांकडे तारण ठेवलेली होती.

तरीदेखील त्यांनी कागदोपत्री फेरफार करून तीच मालमत्ता वारंवार गहाण दाखवत कर्ज उचलले.

मिळालेला कर्जाचा मोठा हिस्सा नंतर वैयक्तिक खात्यांमध्ये वळवून मनी लॉन्डरिंगद्वारे वापरल्याचा संशय ‘ईडी’ला आहे.