पणजी: अमलीपदार्थ विरोधी पथकाने एका मोठ्या कारवाईत, सुमारे ११ कोटी रुपये किमतीच्या एलएसडी ड्रग्ज प्रकरणात फरार असलेल्या संशयित विनीश वाय. के. याला अटक केली आहे. संशयित केरळचा मूळ रहिवासी असून शिवोली येथे राहत होता. संशयिताला ७ डिसेंबर रोजी बंगळुरू विमानतळावर अटक करण्यात आली.

एनडीपीएस कायदा, १९८५ च्या कलम २०(बी)(२)(बी), २२(सी), आणि ८(सी) सह कलम २९ अंतर्गत गुन्हा नोंदवण्यात आला आहे. हे प्रकरण ११०.७० ग्रॅम एलएसडी लिक्विड जप्त करण्याशी संबंधित आहे. याची आंतरराष्ट्रीय बाजारात ११ कोटी ७ लाख रुपये किंमत असल्याचा अंदाज पोलिसांनी व्यक्त केला.

संशयित विनीश वाय. के. परदेशात पळून जाऊ नये यासाठी त्याच्याविरोधात सक्रिय लूकआऊट सर्कुलर जारी करण्यात आले होते. या सर्कुलरच्या आधारावर, ब्युरो ऑफ इमिग्रेशनने त्याला बंगळुरू विमानतळावर ताब्यात घेतले.

याची माहिती मिळताच, एएनसी पोलिसांनी तातडीने बंगळुरूला जाऊन आवश्यक कायदेशीर प्रक्रिया पूर्ण करून, ट्रान्झिट रिमांड मिळवला आणि संशयिताला गोव्यात आणले. संशयिताला आज न्यायालयात हजर करण्यात आले असता पुढील तपासासाठी चार दिवसांची पोलिस कोठडी संशयिताला सुनावली आहे.