वास्को: दाबोळी येथील ‘प्रभू व्हायोलेटा’ इमारतीत अतिसाराच्या आजाराचा उद्रेक झाला आहे. तेथील रुग्णसंख्या झपाट्याने वाढत दीडशेवर पोहोचली आहे. सुरुवातीला सुमारे ६५ प्रकरणे आढळल्यानंतर आता परिस्थिती गंभीर बनली असून दूषित पाणी हे यामागील मुख्य कारण असू शकते, असा संशय व्यक्त करण्यात येत आहे. कुठ्ठाळी प्राथमिक आरोग्य केंद्र व एकात्मिक रोग निगराणी कार्यक्रम (IDSP) यांच्या पथकांनी परिसरात सर्वेक्षण व जनजागृती मोहीम सुरू केली आहे. घरोघरी जाऊन रुग्णांची तपासणी केली जात आहे. नागरिकांना पिण्यासाठी उकळलेले पाणी वापरण्याचा सल्ला देण्यात आला आहे.

सार्वजनिक बांधकाम विभागालाही पाणीपुरवठा व पाईपलाईनची सखोल तपासणी करण्याचे निर्देश देण्यात आले आहेत. उपजिल्हाधिकारी भगवंत करमली यांनी या प्रकरणावर बारकाईने लक्ष ठेवले असून संबंधित विभागांना आवश्यक ती कार्यवाही करण्यास सांगितले आहे. दरम्यान, वाढत्या रुग्णसंख्येमुळे परिसरात भीतीचे वातावरण पसरले आहे. रहिवाशांनी वास्को पोलिसांशी संपर्क साधत जबाबदारी निश्चित करून तातडीने उपाययोजना करण्याची मागणी केली आहे.

बोअरवेलचा पाणीपुरवठा थांबवला

आरोग्य सेवा संचालनालयाने बोअरवेल, भूमिगत टाकी तसेच पाण्याच्या टाक्यांमधून नमुने गोळा करून तपासणीसाठी पाठवले आहेत. त्‍यांचे अहवाल प्रतीक्षेत आहेत. बोअरवेलचे पाणी दूषित असल्याचा प्राथमिक अंदाज व्यक्त करत त्याचा पुरवठा तात्पुरता थांबवण्याचे निर्देश देण्यात आले आहेत.