मडगाव: लग्नाचे आमिष दाखवून १७ वर्षीय अल्पवयीन मुलीचे लैंगिक शोषण केल्याप्रकरणी मायणा-कुडतरी पोलिसांनी अटक केलेल्या यशवंत हरिजन (वय २६) याला अधिक तपासासाठी चार दिवसांची पोलिस कोठडी देण्यात आली आहे. सध्या त्याची कसून चौकशी सुरू आहे.

गेल्या वर्षभरापासून तो पीडितेवर अत्याचार करत होता. ही बाब घरच्यांच्या लक्षात आल्यानंतर त्यांनी तिला विश्वासात घेऊन विचारणा केली असता संपूर्ण प्रकार उघडकीस आला. त्यानंतर कुटुंबीयांनी सामाजिक कार्यकर्त्या प्रतिमा कुतिन्हो यांच्याशी संपर्क साधून पोलिस ठाण्यात तक्रार नोंद केली. पोलिसांनी तत्काळ कारवाई करत संशयिताला अटक केली.

दरम्यान, यशवंत हा बस चालक असून तो रुमडामळ, दवर्ली येथे राहतो. तो मूळचा बेळगाव येथील आहे. पीडिता मडगाव येथे टेलरिंग वर्गाला जात असताना त्याने तिच्याशी गोड बोलून मैत्री केली व नंतर विवाहाचे आमिष दाखविले. त्यानंतर तिचे लैंगिक शोषण करण्यास सुरुवात केली.

यशवंत हा गेल्या वर्षभरापासून पीडितेवर अत्याचार करीत आहेत. वेगवेगळी आमिषे दाखवत होता. त्याने तिची फसवणूक केली, असे तक्रारीत म्हटले आहे.या प्रकरणी संशयिताविरुद्ध पॉक्सो कायद्यांतर्गत कलम ४ व ६ तसेच भारतीय न्याय संहितेच्या कलम ६४(२) अंतर्गत गुन्हा नोंद करण्यात आला आहे, अशी माहिती मायणा-कुडतरी पोलिस ठाण्याचे पोलिस निरीक्षक कपिल नायक यांनी दिली.