Goa Crime Case: थिवी येथे शुल्लक कारणावरून चुलत्याला मारहाण केल्याप्रकरणी कोलवाळ पोलिसांनी अटक केलेल्या सागर सुरेश शिरोडकर (36) याची सशर्त जामिनावर सुटका करण्यात आल्याची माहिती प्राप्त होतेय.

संशयितास 25 हजार रूपये हमी रक्कम व तितक्याच रकमेचा हमीदार, न्यायालयात आरोपपत्र सादर होईपर्यंत थिवी गावात प्रवेश न करणे, समान गुन्हा न करणे, तक्रारदार किंवा या गुन्ह्याशी निगडित लोकांना धमकी किंवा आमिष दाखवण्याचा प्रयत्न करू नये, अशा अटीनुसार डिचोली प्रथम श्रेणी न्यायाधीश अनुराधा आंद्रादे यांनी संशयिताचा जामीन अर्ज मंजूर केला. संशयिताच्यावतीने न्यायालयात अ‍ॅड. विनायक पोरोब यांनी युक्तीवाद केला.

दरम्यान, मंगळवारी 12 मार्च रोजी, संशयित सागर शिरोडकर याने फिर्यादी उदय सिताराम शिरोडकर (53) या आपल्या स्वतःच्या चुलत्यावर कोंबड्या व लाकडे चोरल्याचा आरोप करीत लाकडी दंडुकाने मारहाण करून त्यांना जीवे मारण्याची धमकी दिली होती.

याप्रकरणी कोलवाळ पोलिसांनी भादंसंच्या 324, 504 व 506(2) कलमांतर्गत गुन्हा नोंदवून संशयित सागर शिरोडकर यास गुरूवारी 14 रोजी अटक केली होती.