म्हापसा: गोव्यातील म्हापसा शहरात एक धक्कादायक घटना घडली आहे, ज्यामुळे ज्येष्ठ नागरिकांच्या सुरक्षिततेचा प्रश्न ऐरणीवर आला आहे. गावस वाडा, म्हापसा येथे रविवार(दि. ८) सायंकाळी ५ वाजण्याच्या सुमारास ७५ वर्षीय जमाल अहमद यांच्यावर एका अज्ञात व्यक्तीने अचानक हल्ला केला. रस्त्यावरून चालत असताना हल्लेखोराने एक मोठा दगड उचलून थेट त्यांच्या डोक्यात मारला, ज्यामुळे ते गंभीर जखमी झाले आहेत.

नेमके काय घडले?

मिळालेल्या माहितीनुसार, जमाल अहमद हे आपल्या नेहमीच्या मार्गाने चालले होते. त्यावेळी अचानक एका अज्ञात व्यक्तीने त्यांच्यावर हल्ला केला. कोणताही वाद किंवा कारण नसताना झालेल्या या हल्ल्यामुळे अहमद यांना मोठा धक्का बसलाय. डोक्यात दगड लागल्याने ते गंभीर जखमी झाले आणि रस्त्यावरच कोसळले.

या घटनेनंतर परिसरातील नागरिकांनी तात्काळ धाव घेतली. त्यांनी जमाल अहमद यांना तातडीने म्हापसा येथील जिल्हा रुग्णालयात दाखल केले.

डोक्याला गंभीर दुखापत झाल्यामुळे आणि अधिक तपासणीसाठी, त्यांना नंतर गोवा वैद्यकीय महाविद्यालय (GMC) येथे सीटी स्कॅनसाठी पाठवण्यात आले आहे. त्यांची प्रकृती सध्या स्थिर असली तरी, अशाप्रकारे भरदिवसा झालेल्या हल्ल्यामुळे परिसरात भीतीचे वातावरण निर्माण झाले आहे.

पोलिसांत तक्रार दाखल, तपास सुरू

पीडित जमाल अहमद यांच्या कुटुंबियांनी अज्ञाताविरोधात म्हापसा पोलीस ठाण्यात तक्रार दाखल केली आहे. पोलिसांनी या गंभीर प्रकरणाची नोंद घेतली असून, हल्लेखोराचा शोध घेण्यासाठी अधिक तपास सुरू केला आहे.

या घटनेमुळे म्हापसा परिसरातील ज्येष्ठ नागरिकांच्या सुरक्षिततेबद्दल चिंता व्यक्त केली जात आहे, आणि हल्लेखोराला लवकर पकडून कठोर कारवाई करण्याची मागणी नागरिकांकडून होत आहे.