Drugs Case Goa

पणजी: मूळच्या छत्तीसगडच्या व सध्या गिरी येथे भाडेपट्टीवर राहत असलेल्या आशा अजय लक्रा या ४० वर्षीय महिलेच्या खोलीवर क्राईम ब्रँचच्या पथकाने छापा टाकला. या कारवाईत तिच्या पर्समधून सुमारे २४० एमडीएमए व एक्स्टसीच्या गोळ्या व खोलीतून मोबाईल फोन जप्त केला आहे. या ड्रग्सची किंमत सुमारे ६ लाख ८० हजार रुपये असल्याची माहिती पोलिस अधीक्षक राहुल गुप्ता यांनी दिली.

राज्यात ड्रग्स व्यवसाय किनारपट्टी परिसरात पुरुषांसह आता महिलाही या व्यवसायात गुंतल्या आहेत. झटपट पैसा मिळवण्याच्या आमिषाने परप्रांतीय महिला ड्रग्स माफियांबरोबर काम करत असल्याची माहिती क्राईम ब्रँचला मिळाली होती.

त्यानुसार पोलिसांनी किनारपट्टीवरील संशयास्पद फिरणाऱ्या व ड्रग्स माफियांशी संबंध असलेल्या महिलांवर पाळत ठेवली होती. काल संध्याकाळी एका महिलेला पोलिसांनी हेरून तिला ताब्यात घेतले व तिच्या उपस्थितीत गिरी येथील तिच्या घरी तपासणी केली असता त्रिकोणी व अंडाकृती आकाराच्या एमडीएमए व एक्सटीच्या गोळ्या सापडल्या होत्या.

या गोळ्यांचे वजन सुमारे ११८.५३७ ग्रॅम आहे. तिने त्या गोळ्या आपल्या पर्समध्ये दोन वेगवेगळ्या पॉलिथिन पिशवीमध्ये ठेवल्या होत्या. ड्रग्स बाळगल्याप्रकरणी तिला अटक करून गुन्हा दाखल करण्यात आला आहे. या प्रकरणाचा तपास पोलिस निरीक्षक लक्षी आमोणकर करत आहेत.

छत्तीसगडमधील तरुणीला अटक

किनारी भागात ड्रग्स माफिया व विक्रेत्यांचा सुळसुळाट झाला आहे. ही साखळी मोठी असून ती आता हॉटेल कर्मचाऱ्यांपर्यंत पोहचली आहे. त्यामुळे हॉटेलमध्ये राहणाऱ्या पर्यटकांना त्यांना हवा तो ड्रग्स काही हॉटेलात कामाला असलेले कर्मचारी उपलब्ध करत आहेत. त्यामुळे ड्रग्स माफियांनाही या ड्रग्स व्यवसाय वाढविला आहे मात्र त्यापुढे पोलिस यंत्रणा ड्रग्स विक्री नियंत्रणात आणण्यासाठी कमकुवत पडत आहे.