मडगाव: घरगुती वादातून काकाच्या पोटात चाकू खुपसून खून केल्याप्रकरणी दोषी ठरलेल्या  दापट-लोलये येथील अजय खरात (वय २९ वर्षे) याला दक्षिण गोवा अतिरिक्त सत्र न्यायालयाने जन्मठेपेची शिक्षा सुनावली. शिवाय २५ हजार रुपये दंड व तो भरल्यास मृताच्या पत्नीला देण्याचा आदेशही  दिला आहे.

अतिरिक्त सत्र न्यायाधीश सुधीर शिरगावकर यांनी हा निवाडा  दिला. हे खून प्रकरण २० नोव्हेंबर २०२२ रोजी सकाळी सातच्या सुमारास घडले होते. आरोपी अजय खरातचे वडील दारूच्या आहारी गेल्याने कुटुंबात वारंवार वाद होत असत. त्या दिवशी अजयचे काका जानू खरात (वय ४४ वर्षे) हे त्याच्या वडिलांना घरी घेऊन जाण्यासाठी आले होते.

त्यावेळी दोघांमध्ये शाब्दिक वाद झाला. या वादाचे पर्यवसान हाणामारीत झाले आणि संतापाच्या भरात अजयने काकाच्या पोटात चाकू खुपसला. या गंभीर हल्ल्यात जानूचा जागीच मृत्यू झाला. घटनेनंतर आरोपीने घटनास्थळावरून पळून जाण्याचा प्रयत्न केला. मात्र, काणकोण पोलिसांनी तातडीने तपासाची चक्रे फिरवत अवघ्या दोन तासांत त्याला अटक केली होती.

या प्रकरणाचा तपास तत्कालीन पोलिस निरीक्षक चंद्रकांत  गावस यांनी केला. न्यायालयात सरकारी वकील उत्कर्ष आवडे यांनी प्रभावीपणे बाजू मांडली. त्यांनी १७ साक्षीदारांच्या साक्षी आणि इतर पुरावे सादर करून आरोपीविरुद्ध खुनाचा गुन्हा सिद्ध केला.

दोन्ही बाजूंचा युक्तिवाद आणि पुरावे तपासल्यानंतर न्यायालयाने  अजयला खुनाच्या आरोपाखाली दोषी ठरविले.  जानूची पत्नी व मुलगा हे प्रत्यक्षदर्शी साक्षीदार  होते. त्यांची साक्ष या खटल्यात अत्यंत महत्त्वपूर्ण ठरली. शवचिकित्सा अहवालात मृतदेहावर एकूण नऊ जखमा आढळल्या. त्या चाकूच्या हल्ल्यामुळे होऊ शकतात, अशी साक्ष शवचिकित्सक  डॉ. मधू घोडकिरेकर  यांनी दिली होती.