फातोर्डा: एखादे गीत रसिकांना आवडावे किंवा ते गाणे त्यांच्या ओठावर सदैव रहावे  व ते प्रसिद्ध व्हावे यासाठी गीतकार (Lyricist), संगीत संयोजक(Music Arranger), संगीतकार व गायक (Musician & Singer) या सर्वांचे योगदान महत्वाचे असते असे एकमत, चार दिवसीय चाललेल्या 'गीत जन्मताना' कार्यशाळेच्या (Geet Janmatana Workshop) समारोप सोहळ्यात सर्वच तज्ञांनी व्यक्त केले, ही कार्यशाळा सम्राट क्लब मडगाव (Samrat Club Margao), अंतर्नाद क्रिएशन्स (Antrnaad Creation)व पलाश अग्नी स्टुडिओने (Palash Agni Studio) आयोजित केली होती.

या चार दिवसीय कार्यशाळेत डॉ, राजय पवार, साईश पाणंदीकर (गीतकार), यतिन तळावलीकर, दिलीप वझे (संगीतकार), विष्णू शिरोडकर, सिंधुराज कामत (संगीत संयोजक), डॉ. प्रविण गावकर, अक्षदा तळावलीकर (गायक), यानी भाग घेऊन गीत जन्मतानाचे अनेक बारकावे व अनुभवांचे कथन केले. प्रसिद्ध संगीतकार अशोक पत्की, कौशल इनामदार, तसेच संगीत संयोजक मिथिलेश पाटणकर यांनीही या कार्यशाळेत मार्गदर्शन केले.

आधुनिक तंत्रज्ञानांमुळे गीत निर्मितीचे काम जरी सोपे झालेले असले तरी जास्त वादकांची गरज भासत नसल्याने कित्येक वादकांना उपजिविकेसाठी आटापिटा करावा लागते, याबद्दल चर्चेत चिंता व्यक्त करण्यात आली. प्रत्येक जण जरी व्यावसायिक नजरेने विचार करीत असला तरी कार्यक्रमाचे आयोजन करताना किंवा गीत निर्मितीसाठी एक दोन वादकांचा जरुर विचार करावा, अशी सुचना यावेळी करण्यात आली. गीत निर्मितीत काम करणाऱ्या सर्वानाच संगीतातील स्वर,राग, लय, ठेक्याचे ज्ञान असणे महत्वाचे असल्याचा सूरही या चर्चासत्रात व्यक्त करण्यात आला. समारोप सोहळ्याच्या चर्चा सत्राचे सुत्रसंचालन प्रा. गोविंद भगत यांनी केले. तर समारोप सोहळ्याची सुरुवात अनिश अग्नी यांच्या निवेदनाने झाली. सम्राट क्लब मडगावचे अध्यक्ष पराग रायकर यांनी सर्वांचे आभार व्यक्त केले.