म्हापसा: बागा आणि हडफडे येथील दोन दुकानांवरील डिजिटल फलकावर पाकिस्तान जिंदाबाद लिहल्याचा प्रकार मंगळवारी उघडकीस आला. याप्रकरणी पोलिसांनी दुकान मालकांविरोधात गुन्हा नोंद केला आहे.

दरम्यान, मुख्यमंत्री डॉ. प्रमोद सावंत यांनी देखील याप्रकरणाची गंभीर दखल घेत सक्त कारवाईचे आदेश दिले आहेत.

बागा आणि हडफडे येथील सलून आणि वाईन शॉपच्या दुकानावर असलेल्या डिजिटल फलकावर पाकिस्तान जिंदाबाद लिहल्याचे आढळून आले. रात्रीच्या सुमारास हा प्रकार उघडकीस आल्यानंतर स्थानिकांनी कारवाईची मागणी केली.

पोलिसांनी घटनास्थळी दाखल होत परिस्थिती चिघळण्यापूर्वी फलक बंद केला. पोलिसांनी दोन्ही दुकानदारांविरोधात गुन्हा नोंद केला आहे.

मुख्यमंत्री प्रमोद सावंत यांना याबाबत विचारणा केली असता दुकानदारांनी विनापरवानगी फलक लावल्याचे सांगितले. दरम्यान, दोन्ही दुकानदारांविरोधात सक्त कारवाई करण्याचे आदेश देण्यात आल्याचे त्यांनी सांगितले.

दुसरीकडे पोलिसांनी याप्रकरणी गुन्हा नोंद केला असून, दुकान मालकांना ताब्यात घेतले आहे. दरम्यान, डिजिटल बोर्ड हॅक केला असावा, असा संशय पोलिसांनी व्यक्त केला आहे. याप्रकरणी अधिक तपास सुरु आहे.

अवैद्य मद्य तस्करीप्रकरणी इशारा

राज्यातून सुरु असलेल्या अवैध मद्य तस्करीप्रकरणी मृख्यमंत्री तथ गृहमंत्री प्रमोद सावंत यांनी इशारा दिला असून, हा प्रकार खपवून घेणार नसल्याचे स्पष्ट केले.

"कोणीही गोव्यात दारु घेऊन येऊ नये तसेच, अवैध पद्धतीने गोव्यातून बाहेरच्या राज्यात मद्य तस्करी करु नये. भेसळ आणि तस्करी विरोधात कडक कारवाई केली जाईल", असे सावंत म्हणाले.