पणजी: राज्याचे माजी मुख्यमंत्री प्रा. लक्ष्मींकांत पार्सेकर (Laxminkant Parsekar) हे अध्यक्ष असलेल्या हरमल पंचक्रोशी महाविद्यालयाचे प्रत्यक्ष वर्ग सुरु होऊन 25 दिवस उलटले, तरी राज्यातील अन्य खाजगी व सरकारी महाविद्यालयांचे प्रत्यक्ष वर्ग अद्याप सुरु झाले नाहीत. त्यामुळे आश्‍चर्य व्यक्त करण्यात येत आहे. दुसरीकडे राज्यातील महाविद्यालयात शिकणाऱ्या बहुतांश मुलांनी कोरोना प्रतिबंधक लसीचा पहिला डोस घेतलेला असल्याने व राज्यात कोरोना नियंत्रणात असल्याने लवकरात लवकर किमान महाविद्यालये तरी सुरु करा असी मागणी होत शाळा आहे.

सोशल मिडियावर (Social media) महाविद्यालयीन मुलांतर्फे ही मागणी होत आहे. याबाबत हरवळे येथील एक पालक शिवराम नाईक यांनी सांगितले मोबाईलची योग्य रेंज घरात मिळत नसल्याने आपल्या मुलाला रेंजसाठी बाहेर इकडे तिकडे फिरावे लागते. पावसाचे दिवस असल्याने रेंज मिळत नाही. सध्या कोरोना नियंत्रणात आहे. बाजार भरतात, बसेस सुरु झाल्या असून त्या भरुन जातात. आम्ही बसमधून फिरतो. मग मुलांना कॉलेजात जाण्यास काय अडचण आहे?. गेले दिड वर्ष मुले घरात राहून कंटाळली आहेत. एक वर्ष आॅनलाईन वर्ग घेऊन शिकले.

निदान आतातरी प्रत्यक्ष वर्ग सुरु करावेत. अशी माझी सरकारकडे विनंती आहे. असे नाईक म्हणाले. दुसरे थिवी येथील एक पालक राजन पेडणेकर हे म्हणाले की महाराष्ट्रात कोरोना जास्त आहे तरी तेथील सरकारने 7 आॅक्टोंबर पासून हायस्कूल व महाविद्यालये सुरु करण्यास परवानगी दिलेली आहे. गोवा सरकारनेही येत्या महिन्यापासून किमान उ.मा. विद्यालये व कॉलेज सुरु करावेत त्यानंतर हायस्कूल सुरु करावीत. कारण घरात मुले अभ्यास करत नाहीत.