Goa Church Marriages: चर्चमध्ये विवाह सोहळा पार पाडल्यानंतर विवाह नोंदणी पत्रकाची नोंदणीकृत प्रत नागरी नोंदणी कार्यालयात जमा करण्यास चर्चने विलंब केल्यास आता दंड म्हणून शुल्क आकारणी केली जाणार आहे.

हे प्रमाणपत्र जमा करण्यास चार महिने म्हणजे 120 दिवस विलंब केल्यास कायदा आणि न्यायव्यवस्था विभाग 2000 रुपये शुल्क आकारेल.

विवाह नोंदणी पत्रके नागरी नोंदणी कार्यालयात जमा करण्यास विलंब होत असल्याचे लक्षात आल्यानंतर हे शुल्क आकारण्याचा निर्णय घेण्यात आला आहे.

जर हा विलंब 120 ते 180 दिवस इतका असेल तर त्याकरीता 5,000 रुपये दंड आकारला जाईल. जर विलंब 180 ते 365 दिवस म्हणजे एक वर्षापर्यंत असेल तर हे शुल्क 7,500 रुपये असेल. आणि एका वर्षाहून अधिक विलंबासाठी 10,000 रुपये दंड ठोठावला जाईल.

बऱ्याचदा लग्न झालेली अनेक जोडपी त्यांच्या विवाह प्रमाणपत्रांसाठी कार्यालयात संपर्क साधतात. पण त्यांचे विवाहाबाबतची पत्रके नागरी नोंदणी कार्यालयात पाठविण्यास काही पुजाऱ्यांनी विलंब केल्याचे निदर्शनास आले आहे. त्यामुळे संबंधितांना प्रमाणपत्र मिळत नाही.

या विलंबामुळे, गोवा आणि दमणच्या आर्कडायोसीसचे कुलपती फादर रोमियो मॉन्टेरो यांनी गेल्या महिन्यात सर्व रहिवासी पुजाऱ्यांना प्रत्येक महिन्याच्या 10 तारखेपर्यंत नागरी नोंदणी कार्यालयात विवाह नोंदणी पत्रके पाठवण्याची सूचना केली होती.

जर ही पत्रके संबंधित कार्यालयाकडे वेळेत पाठवली गेली नाहीत तर, नागरी प्राधिकरणाद्वारे विहित विवाहाची नोंदणी केली जाणार नाही. त्यामुळे संबंधित विवाहीत जोडप्याला अडचणी येऊ शकतात.