म्हापसा: छत्रपती शिवाजी महाराजांच्या पुतळ्याची विटंबना केल्याप्रकरणी तीन आरोपींपैकी एकाविरोधात आरोप निश्चित करण्याचे आदेश म्हापसा कोर्टाने दिले आहे. पुतळ्याची मोडतोड करुन सार्वजनिक भावना दुखावल्याबद्दल आरोप निश्चित करण्याचे निर्देश न्यायालयाने दिले आहेत. २०२३ मध्ये आयडीसी करसवाडा येथे शिवरायांच्या पुतळ्याची विटंबना केल्याचा प्रकार उघडकीस आला होता.

आरोपी नायगेल फॉन्सेका याच्याविरोधात आरोप निश्चित करण्याचे निर्देश कोर्टाने दिलेत. प्रथमदर्शनी त्यानेच गुन्हा केल्याचे दर्शवणारे पुरेसे पुरावे त्याच्याविरोधात असल्याचे निरीक्षण कोर्टाने नोंदवले आहे. तर, आलेक्स फर्नांडिस आणि लॉरेन्स मेंडीस यांना दोषी ठरवणारे पुरेसे पुरावे उपलब्ध नसल्याने त्यांची निर्दोष सुटका करण्यात आलीय.

आलेक्स फर्नांडिस आणि लॉरेन्स मेंडीस यांचा या गुन्ह्यात सहभाग नसल्याचे निरीक्षण कोर्टाने नोंदवले आहे. करसवाडा येथील शिवरायांच्या पुतळ्याची मोडतोड केल्याचा आरोप तिघांविरोधात होता.

याप्रकरणी चंदन कुमार या प्रत्यक्षदर्शीने कोर्टात जबानी दिली होती. कोर्टाने कुमार यांची जबानी विचारात घेतली. चंदन कुमार यांनी न्यायालयात सांगितले की, तिघे संशयित वडाच्या झाडाखाली बसले होते. तिघांनीही मद्य प्राशन केले होते. तिघांनी कुमार यांना शिवीगाळ केली आणि प्रार्थना करताना शिवरायांच्या पुतळ्याच्या दिशेने दगड भिरकावला. 

आरोपी नायगेल फॉन्सेका याने पुतळ्याच्या दिशेने दगड भिरकावला त्यात पुतळ्याचे नुकसान झाले, अशी जबानी कुमार यांनी दिली. तिघेही दारुच्या नशेत असले तरी फॉन्सेका यानेच पुतळ्यावर दगड मारल्याचे कुमार यांनी सांगितले. दरम्यान, आरोप निश्चितीनंतर आरोपी फॉन्सेका यांना काय शिक्षा जाहीर केली जाणार? याकडे सर्वांचे लक्ष लागले आहे.