PM Narendra Modi: बेतुल येथे एनर्जी वीकचे उद्घाटन करण्यासाठी पंतप्रधान मोदी 6 फेब्रुवारी रोजी गोव्यात येणार असून त्यानंतर त्यांची मडगाव येथे जाहीर सभा होणार आहे. मोदींच्या या गोवा भेटीवर आता विरोधी पक्ष नेत्यांनी टीका केली आहे.

घाबरलेले भाजप सरकार 6 फेब्रुवारी 2024 रोजी पंतप्रधानांच्या गोवा भेटीचे कारण देत गोवा विधानसभा अधिवेशनाचा कार्यकाळ कमी करुन विरोधकांच्या सरळ प्रश्नांना सामोरे जाण्यापासून पळवाट काढणार नाही अशी आशा बाळगतो अशी शेलकी टिका विरोधी पक्षनेते युरी आलेमाव यांनी केली आहे.

6 फेब्रुवारी रोजी पंतप्रधान मोदी गोवा दौऱ्यावर येत असून या दौऱ्याबाबत आढावा घेण्यासाठी भाजपची कोअर कमिटीची बैठक झाली. त्यानंतर ही माहिती मुख्यमंत्री प्रमोद सावंत यांनी दिलीय. त्यावरूनच विरोधकांनी सरकारवर टोलेबाजो केलीय.

गोव्याचे अर्थसंकल्पीय अधिवेशन येत्या २ फेब्रुवारी पासून सुरु होत आहे. या दरम्यान विरोध सत्ताधाऱ्यांना बेरोजगारी, स्मार्ट सिटी, पाणी प्रश्न यांसारख्या मुद्द्यावरून घेरण्याचा तयारीत आहे.

या अधिवेशनाच्या कालावधीतच पंतप्रधान मोदी गोवा दौऱ्यावर येत असल्याने विरोधकांनी सरकारवर टीका करायला सुरुवात केली आहे.

विशेष म्हणजे मोदींची मडगाव येथे सभा असून २०२४ च्या निवडणूकीच्या पार्श्वभूमीवर पंतप्रधान काय बोलणार याकडे विरोधकांसह सत्ताधाऱ्यांचेही लक्ष लागले आहे.