Goa Bison Attack: गव्याने धडक दिल्याने सुळकर्णे पिर्ला येथील एका २२ वर्षीय युवकाचा दुर्दैवी मृत्यू झाला आहे. मंगळवारी रात्री ही घटना घडली आहे. सदानंद गावकर असे या तरूणाचे नाव आहे.

सदानंद गावकर हे सुळकर्णे पिर्ला येथीलच रहिवासी होते. ते एका खासगी कंपनीत ड्रायव्हर म्हणून काम करत होते. मंगळवारी रात्री ते कामावरून घरी परतत असताना गावाजवळ आल्यावर रस्त्यावरच त्यांना गव्यांचा कळप दिसला.

अचानक गव्यांचा कळप सामोरा आल्याने गांवकर यांना काही सुचेना. इतक्यात एका गव्याने त्यांना जोरात धडक दिली. त्यामुळे ते उडून झाडावर पडले. यात त्यांच्या डोक्याला गंभीर दुखापत झाली. रात्री साडेनऊच्या सुमारास हा प्रकार घडल्याची शक्यता वर्तवण्यात येत आहे.

रात्री एक वाजता त्यांची दुचाकी लोकांना आढळून आली. तेव्हाच त्यांचा मृत्यू झाल्याचेही ग्रामस्थांच्या लक्षात आले.

गांवकर हे विवाहीत होते. त्यांच्या मृत्यूनंतर गावांत हळहळ व्यक्त होत आहे. दरम्यान, या घटनेची पोलिसांत नोंद झाली आहे. पोलिसांनी पंचनामा केला आहे. दरम्यान, ग्रामस्थांनी प्रशासनाकडे गांवकर कुटूंबाला भरपाई देण्याची मागणी केली आहे.