School Program ''उडान'' हा पहिलावहिला विशेष मुलांचा ‘कराओके’ गायनाचा कार्यक्रम डिचोलीत रंगला. विशेष मुलांच्या अविष्काराने उपस्थित भारावून गेले.

डिचोली सम्राट क्लबतर्फे गुरुवारी (ता.१०) वृंदा दीनानाथ तारी सभागृहात या कार्यक्रमाचे आयोजन करण्यात आले होते. ‘देश प्रथम’ या विषयानुरूप नाविन्यपूर्ण संकल्पनेतील हा कार्यक्रम होता.

माजी शिक्षक व ज्येष्ठ प्रवचनकार दीनानाथ तारी यांच्या हस्ते कार्यक्रमाचे उदघाटन करण्यात आले. यावेळी सम्राट क्लबचे अध्यक्ष नीलेश टोपले, खजिनदार शेखर नाईक, समन्वयक भारत चणेकर, केशव सेवा साधना शाळेचे व्यवस्थापक मकरंद कामत ‘उडान’ या कार्यक्रमाच्या संयोजिका डॉ. मंजिरी जोग आदी उपस्थित होते.

सामाजिक संस्थांनी आजच्या विद्यार्थ्यांवर सुसंस्कार करण्यासाठी पुढाकार घ्यावा, असे आवाहन दीनानाथ तारी यांनी यावेळी बोलताना केले. विशेष मुलांच्या कलागुणांना वाव मिळावा आणि त्यांना व्यासपीठ मिळावे.

ही उडान कार्यक्रमामागील संकल्पना आहे. असे डॉ. मंजिरी जोग यांनी सांगितले. नीलेश टोपले यांनी स्वागत केले. प्रा. प्रवीण सावंत यांनी सूत्रसंचालन केले. भारत चणेकर यांनी आभार मानले.

‘दिल दिया है, जान भी देंगे’ ला वन्समोअर

डॉ. मंजिरी दत्तप्रसाद जोग यांच्या मार्गदर्शनाखाली डिचोलीतील केशव सेवा साधना या शाळेतील रुद्रेश गाड, विभा काणेकर, यश कळंगगुटकर यांनी देशभक्तीपर गीते सादर करुन उपस्थितांकडून दाद मिळवली. विभा काणेकर हिने‘दिल दिया है, जान भी देंगे’ या गीताला वन्समोर मिळवला.