गुजरात येथील उद्योजक अनंत तन्ना याला ‘हॅनी ट्रॅप’मध्ये अडकवून त्याच्याविरुद्ध बलात्काराची पीडितेने तक्रार दाखल केली होती. महिला पोलिसांनी दाखल केलेल्या आरोपपत्रात सत्र न्यायालयाने अनंत तन्ना याच्याविरुद्ध आरोप निश्‍चित करण्याचा दिलेला आदेश मुंबई उच्च न्यायालयाच्या गोवा खंडपीठाने रद्दबातल ठरविला. त्यामुळे या संशयित ठरविलेल्या उद्योजकाला दिलासा मिळाला आहे.

सत्र न्यायालयात आरोपपत्र सादर केल्यानंतर महिला पोलिसांनी आणखी तपास केला होता, त्यात पीडित तरुणीने केलेली तक्रार पुरवणी आरोपपत्रात प्रकरण बंद करण्याच्या पोलिसांनी सादर केलेल्या मुद्यावर पुनर्विचार करण्याचे निर्देश मुंबई उच्च न्यायालयाच्या गोवा खंडपीठाने दिले आहेत. पीडितेने खोट्या माहितीद्वारे तक्रार दाखल केल्याने संशयिताला या पीडितेविरुद्ध तक्रार दाखल करण्याची परवानगी उच्च न्यायालयाने दिली आहे.

गुजरातचा उद्योजक अनंत तन्ना याच्यावर कच्छ येथील एका तरुणीला मॉडेलसाठी गोव्यात आणून तिच्यावर बलात्कार केल्याचा आरोप पीडित तरुणीने केला होता. तिने त्यासंदर्भात तक्रार पणजी महिला पोलिस स्थानकात दाखल केली होती. या प्रकरणाच्या चौकशीअंती न्यायालयात आरोपपत्र दाखल करण्यात आले होते. दरम्यान, अशाच प्रकारची तक्रार यी पीडितेने गोव्याबाहेर दाखल केली होती. त्यामुळे तिच्या या तक्रारीसंदर्भात संशय आला होता.

संशयित ‘हॅनी ट्रॅप’चा बळी ठरू शकतो अशी शंका आल्याने आणखी तपास करण्यात आला. यामध्ये हा उद्योजकांना आपल्या जाळ्यात अडकवून त्यांच्याकडून भरमसाट रक्कम वसूल करण्याचा हा प्रकार होता हे उघड झाले. त्यामुळे पोलिसांनी आरोपपत्रावर सुनावणी घेऊन आरोप निश्‍चित करू नये व बी सारांश अतिरिक्त पुरवणीनुसार हे प्रकरण बंद करण्याची विनंती केली होती. मात्र, न्यायालयाने ही विनंती फेटाळून आरोप निश्‍चितीचा आदेश जारी केला होता. याविरुद्ध अनंत तन्ना याने उच्च न्यायालयात आव्हान दिले होते.