पणजी: गोवा शॅक मालक कल्याण सोसायटीने पर्यटन संचालनालयाकडे सादर केलेल्या निवेदनात, बीच शॅक संचालनासाठी निर्धारित हंगाम ३१ मे ऐवजी ८ जूनपर्यंत वाढविण्याची मागणी केली आहे.

हवामानातील अनपेक्षित सकारात्मक बदल व पर्यटकांच्या वाढलेल्या संख्येचा आधार देत ही मागणी करण्यात आली आहे. बुधवारी हा अर्ज सादर करण्यात आला. जूनच्या सुरवातीच्या दिवसांमध्येच देशांतर्गत पर्यटक संख्येत मोठी वाढ नोंदवली गेली आहे. पर्यटकांनी गोव्याच्या किनाऱ्यांकडे अधिक मोठ्या प्रमाणावर मोर्चा वळवला आहे.

पर्यटन संचालक केदार नाईक यांनी या संदर्भात प्रतिक्रिया देताना सांगितले, शॅक व्यावसायिकांनी सादर केलेली वस्तुस्थिती आम्ही गांभीर्याने घेतली आहे.

हवामान पोषक आहे, पर्यटक वाढले आहेत आणि स्थानिक अर्थव्यवस्थेवर याचा सकारात्मक परिणाम होऊ शकतो. तरीही कोणताही निर्णय घेताना सुरक्षेचे निकष आणि पर्यावरणीय भान लक्षात घेतले जाईल.