सासष्टी: मुख्यमंत्री डॉ. प्रमोद सावंत यांनी आज मोतिडोंगर-मडगाव येथे नव्याने बांधलेल्या आयुष इस्पितळाला भेट दिली आणि तेथील सुविधांची पाहणी केली. याप्रसंगी त्यांच्यासमवेत सार्वजनिक बांधकाम मंत्री दिगंबर कामत, आरोग्य खात्याचे संयुक्त सचिव डॉ. प्रणव भट तसेच इतर अधिकारी उपस्थित होते.

याप्रसंगी मुख्यमंत्र्यांनी सांगितले, की मोतिडोंगर आणि वेळगे-साखळी येथील आयुष इस्पितळांचे उदघाटन एका महिन्याच्या आत पंतप्रधान नरेंद्र मोदी यांच्या हस्ते करण्यात येईल. या इस्पितळात आयुर्वेदातील सर्व सेवा उपलब्ध केल्या जातील. तसेच पंचकर्म सुविधासुद्धा येथे दिली जाईल. या दोन्ही इस्पितळांसाठी डॉक्टर व इतर कर्मचारी वर्गाची लवकरच नियुक्ती केली जाईल, असेही त्यांनी स्पष्ट केले.

जिल्हाधिकाऱ्यांना कठोर कारवाईचे आदेश

हल्लीच वकील संघटनेने काही सरकारी अधिकारी म्युटेशनसंदर्भात लाच घेतात, असा आरोप केला होता. यासंदर्भात मडगावात पत्रकारांनी विचारले असता मुख्यमंत्री डॉ. प्रमोद सावंत म्हणाले, की भ्रष्टाचार करणाऱ्या किंवा लाच घेणाऱ्या अधिकारी वा कर्मचाऱ्यांची गय केली जाणार नाही.

जे कोणी अशा बेकायदा प्रकारांमध्ये आढळतात, त्यांना निलंबित केले जाईल किंवा बडतर्फ केले जाईल, असा इशारा मुख्यमंत्र्यांनी दिला. भ्रष्टाचार कुठल्याही परिस्थितीत सहन केला जाणार नाही, असेही त्यांनी यावेळी निक्षून सांगितले. यासंदर्भात चौकशी करून अशा प्रकरणात गुंतलेल्यांवर कठोर कारवाई करण्याचा आदेश जिल्हाधिकाऱ्यांना दिला आहे, असेही त्यांनी यावेळी सांगितले.