Karmal Ghat Traffic Jam: करमल घाट आणि अपघात हे समीकरण आता पक्के झाले आहे असे म्हणायला हरकत नाही. घाटातील वळणावर हमखास अपघातांच्या घटना घडत असतात.

यामध्ये घाटाच्या रुंदीकरणाचा मुद्दा अजूनही रखडलेलाच आहे. आज या घाटात कंटेनर ट्रक पलटी झाल्याची घटना घडली आहे.

वाहन क्रमांक GJ12BV 8374 कंटेनर पाईप घेऊन कारवार हून मडगावच्या दिशेने जात असताना करमल घाटात कुंकळ्ळीच्या बाजूने उतरणीवर कंटेनर आडवा झाल्याने काही पाईप रस्त्यावर कोसळले त्यामुळे हमरस्ता वाहतूकीसाठी बंद राहिला.

ही घटना सोमवारी रात्री १२.३० वाजण्याच्या सुमारास घडली. आज सकाळी ८.३० वाजता पाईप बाजूला काढून हमरस्ता वाहतूकीसाठी खुला करण्यात आला. ही घटना घडल्यानंतर कुंकळ्ळी पोलिसांनी काही प्रमाणात वाहतूक बाळ्ळी, काबदेराम, खोला ते काणकोण अशी वळवली.

रस्त्याच्या मधोमध कंटेनर पलटी झाल्याने बराच वेळ घाटात वाहतूक ठप्प झाली होती. यामुळे इतर वाहनचालकांना नाहक त्रास सहन करावा लागला.

या अपघातामुळे घाटाच्या रुंदीकरणाचा प्रलंबित मुद्दा पुन्हा एकदा चर्चेत आला आहे.

दरम्यान, 20 जूनला घाटातील एका तीव्र वळणावर कार व एलपीजी गॅसवाहू ट्रक यांच्यात समोरासमोर टक्कर होऊन झालेल्या अपघातात कार दरीत कोसळल्याने कारमधील एका युवकाचा जागीच मृत्यू होण्याची दुर्दैवी घटना घडली.

यामुळे घाट रस्त्याच्या रुंदीकरणावर सरकारने गांभीर्याने विचार करून त्वरित काम सुरू करावे अशी मागणी नागरिक करत आहेत.