मोपा: कासारवराणे या ठिकाणी शनिवारी (दि. १०) रात्री दुचाकी व चारचाकी यांच्यात अपघात होऊन सुहास नारुलकर या युवक जागीच ठार झालाय. अपघातानंतर समोर आलेल्या प्राथमिक माहितीनुसार चारचाकी वाहन चालक चुकीच्या मार्गाने आल्यामुळे त्याची दुचाकीला जबरदस्त ठोकर बसली आणि दुचकीवर असलेला सुहास नारुलकर गंभीर जखमी झाल्याने जागीच ठार झालाय.

अपघात झाला कसा?

शनिवारी रात्री MH 04 FF 3447 अशी नंबरप्लेट असलेली गाडी चांदेल येथून कासारवराणेच्या दिशेने जात होती आणि याच दरम्यान मयत सुहास नारुलकर हा देखील कामावरून घरी परतत होता.

महाराष्ट्रातील ही चारचाकी गाडी चुकीच्या दिशेने येत होती आणि तिने सुहास नारुलकरच्या गाडीला जबरदस्त धक्का दिला, यात सुहास नारुलकर गंभीर जखमी झाला आणि मदत मिळण्याच्या आतच त्याला मरण आलं. मोपा पोलिसांनी घटनास्थळी दाखल होत, या आपघातचा पंचनामा केला आहे.

स्थानिकांकडून अपघाताचा संताप व्यक्त :

कासारवराणे येथे झालेल्या अपघताचा स्थानिकांनी संताप व्यक्त केलाय. आजच्या घडीला गोव्याच्या वेगवेगळ्या भागांमध्ये आपघातांच्या घटना सुरूच आहे, मात्र याकडे कोणाचं लक्ष गेलेलं नाही. गोव्यात रात्री-अपरात्री लोकं दारू पिऊन गाडी चालवत आहेत का? असा प्रश्न देखील त्यांनी उपस्थित केला आहे. खुशाल मनात येईल त्याप्रमाणे गाडी चालवणाऱ्या चालकांवर पोलिस किंवा वाहतूक अधिकाऱ्यांकडून कारवाई केली जात नाही. काही गाड्यांना नंबरप्लेट सुद्धा नाही अशा चालकांवर कारवाई केली जावी अशी मागणी स्थानिकांकडून केली जातेय.