गंगाराम आवणे

54 IFFI Goa: गेल्या वर्षी ‘कांतारा’ चित्रपटाच्या प्रमोशनसाठी इफ्फीत अतिथी म्हणून आलो होतो. यंदा इफ्फीत या चित्रपटाला आंतरराष्ट्रीय स्पर्धेत सर्वोत्तम 15 चित्रपटांमध्ये ‘सुवर्ण मयूर’साठी नामांकन मिळाले. जगभरातील महत्त्वपूर्ण चित्रपट या स्पर्धेत असतात. यात ‘कांतारा’ला स्थान मिळणे हीच माझ्यासाठी सन्मानाची बाब असल्याचे प्रतिपादन प्रसिद्ध दिग्दर्शक, अभिनेते ऋषभ शेट्टी यांनी सांगितले. ते पत्र सूचना कार्यालयात माध्यमांशी संवाद साधत होते.

मी केवळ माझ्या प्रेक्षकांना भावणारे, आवडणारे चित्रपट कसे देता येतील याकडेच लक्ष देतो. मी ‘कांतारा’ला इफ्फीच्या आंतरराष्ट्रीय स्पर्धेत स्थान प्राप्त होईल, असा कधीच विचार केला नव्हता, असे ऋषभ यांनी सांगितले. भारतात लोककला, लोकसंस्कृतीची मुळे खोलवर रुजलेली आहेत, त्यामुळे लोकप्रथांवर आधारित चित्रपट भारतीयांना आपलेसे वाटतात ते त्यांना भावतात.

‘कांतारा’ चित्रपटात निसर्ग आणि मानव यांच्यातील संघर्ष रेखाटण्याचा प्रयत्न केला आहे. या चित्रपटाचे चित्रिकरण करताना जेवढी काळजी घ्यायला हवी तेवढी घेत अतिशय भक्तिभावने साकारला असल्याचे शेट्टी यांनी सांगितले.

मी आतापर्यंत दोनदा गोव्यात आलो आहे. दोनदा इफ्फीसाठी तर दोनदा चित्रपटांच्या चित्रिकरणासाठी गोव्यात आलोय. त्या दोन चित्रपटांतील एका चित्रपटाचे दिग्दर्शन मी केले आहे तर एका चित्रपटाच्या गाण्याचे चित्रिकरण केले आहे. त्यावेळी बजेट कमी असल्याने काही चित्रिकरण परवानगीशिवाय केल्याचे शेट्टी यांनी सांगितले.