बोरी: गणपती उत्सवाला अद्याप तीन महिने बाकी असले तरी देऊळवाडा-बोरी येथील स्व. सुमंत बोरकर यांच्या गणपती चित्रशाळेत चिकणमातीपासून गणेश मूर्ती बनविण्याच्या कामाला प्रारंभ झाला आहे.

मान्सूनपूर्व पावसाने यंदा मे महिन्यातच जोर धरल्यामुळे सर्वत्र पावसाळी वातावरण तयार झाले आहे. दरवर्षी जून महिन्यात पावसाला सुरुवात झाल्यावर दुसऱ्या किंवा तिसऱ्या आठवड्यात गणपतीच्या मूर्ती बनवण्याच्या कामाला प्रारंभ केला जातो.

परंतु स्व. सुमंत बोरकर यांच्या दोन पुत्रांनी आपला वडिलोपार्जित गणपती मूर्ती बनविण्याचा उद्योग जोपासला असून पेडणे किंवा सांगे भागातून भाड्याच्या गाडीने चिकणमाती विकत आणली जाते. आता पावसाने जोर धरलेला असल्याने चिकणमातीपासून मूर्ती बनविण्यास ललवकर सुरुवात झालेली आहे. लहान-मोठ्या मध्यम आकाराच्या मूर्ती ग्राहकांच्या मागणीप्रमाणे बनवून देण्याचे काम होते.

माफक दरात गणेशमूर्ती

दिवसेंदिवस रंगरंगोटी, मातीचे दर तसेच मजुरीचे दर गगनाला भिडत असले तरी त्यावर मात करून बोरकर बंधूंनी आपल्या ग्राहकांना माफक दरात गणपती मूर्ती देण्याचे ठरविले आहे. त्यांच्याकडून मूर्ती बनवून घेण्यासाठी बोरीबरोबरच शेजारच्या गावातील आणि शहरातील लोकही येत आहेत, असे बोरकर बंधूनी सांगितले. आपला कामधंदा सांभाळून हे बोरकर बंधू गणपतीच्या मूर्ती बनवून ग्राहकांना देतात, हे विशेष आहे.