Ganesh Idol Artists: बाप्पा पावला... गणेशमूर्ती कलाकारांना एक कोटींचं अनुदान वितरीत

पणजी: गोवा हँडीक्राफ्ट्स, रुरल अँड स्मॉल स्केल इंडस्ट्रीज डेव्हलपमेंट कॉर्पोरेशन लिमिटेडचे अध्यक्ष प्रवीण आर्लेकर यांनी गुरुवारी गणेशमूर्ती कलाकारांसाठी आर्थिक मदतीच्या योजनेअंतर्गत सुमारे १ कोटींच्या अनुदानाचं वितरण केलं.

१२ तालुक्यांतील ३६९ लाभार्थ्यांना या योजनेचा लाभ मिळाला असून, नोंदणीकृत ४५,२४४ गणेशमूर्तींसाठी एकूण ९०,४९,४०० वितरित करण्यात आले. याशिवाय १०% सेवा शुल्क म्हणून ९,०४,९४० मंजूर करण्यात आल्याने एकूण रक्कम ९९,५४,३४० इतकी आहे. गणेशमूर्ती तयार करण्यासाठी ६० चिकणमाती शुद्धीकरण यंत्रे उपलब्ध करून दिल्याचे आर्लेकर यांनी सांगितले.

प्रदूषण नियंत्रण मंडळाकडून यासाठी विशेष प्रयत्न केले जात आहेत. कलाकारांच्या कलेला चालना देण्यासाठी आणि पर्यावरणपूरक उपक्रमांना प्रोत्साहन देण्यासाठी सरकार वचनबद्ध आहे, असेही ते म्हणाले. सरकारच्या या पुढाकारामुळे गोव्यातील स्थानिक कलाकारांना मोठा आधार मिळाला असून, पारंपरिक कला जिवंत ठेवण्यासाठी हा महत्त्वाचा टप्पा ठरणार आहे.

यावेळी प्रवीण आर्लेकर म्हणाले की, गणेशमूर्ती बनविणाऱ्या कलाकारांना सरकारच्या माध्यमातून आर्थिक सहाय्य दिले जात आहे. याआधी कलाकारांना वेळेवर मदत मिळत नव्हती, परंतु यावेळी आम्ही ही मदत जलद गतीने पोहोचवली आहे. काही लाभार्थ्यांना धनादेश देण्यात आले असून काहींच्या बँक खात्यांमध्ये रक्कम जमा केली जाईल.

आर्लेकर यांनी सांगितले की, पणजी बसस्थानक येथील हँडीक्राफ्ट एम्पोरियम आणि म्हापसा एम्पोरियम येथे कलाकारांना त्यांची उत्पादने विक्रीसाठी मोफत जागा उपलब्ध करून दिली जाणार आहे. कलाकारांनी आपली उत्पादने थेट विक्रीसाठी आणावीत. आम्ही ती उत्पादने खरेदी करण्यासही देखील तयार आहोत आणि त्यांचे पेमेंटही तत्काळ केले जाईल.

पर्यावरणपूरक गणेशमूर्तींचे आवाहन

प्लास्टर ऑफ पॅरिसच्या (पीओपी) गणेशमूर्तींमुळे होणारे प्रदूषण रोखण्यासाठी कठोर पावले उचलली जातील असेही आर्लेकर यांनी स्पष्ट केले. ते म्हणाले की, लोकांनी चिकणमातीच्या गणेशमूर्तीच खरेदी कराव्यात. आम्ही पीओपी गणपतींवर कारवाई करणार आहोत. पर्यावरणाची हानी टाळण्यासाठी नागरिकांनीही याला साथ द्यावी, असे ते म्हणाले.