शिमगा संपला तरी कवित्व उरते याप्रमाणेच फोंड्यातील निवडणूक (Goa Election) संपली तरी मतदारसंघातील छुपे रुस्तमांबद्दल ‘खमंग चर्चा’ सुरू आहे. निवडणूक काळात अनेक गोंधळ झाल्याचे सांगितले जात आहे. त्यात कोणी कोणाला ‘शेंडी’ लावली यावर बोट ठेवले जात आहे. फोंड्याच्या काही नगरसेवकांनी तर आपल्या उमेदवाराला कसा ‘चुना’ लावला याबाबतीत चविष्ट किस्से ऐकू येत आहेत.

भाजपच्या (BJP) एका नगरसेवकाने म्हणे काँग्रेसच्या उमेदवाराला मते देण्याचे आपल्या कार्यकर्त्यांना सांगितले, तर काँग्रेसचा (Congress) प्रचार करणाऱ्या एका नगरसेवकाने आपल्या कार्यकर्त्यांना कमळाला मत द्या असा फतवा काढल्याची चर्चा आहे. तसेच भाजपचे एक ज्येष्ठ पदाधिकारी फोन करून आपल्या हितचिंतकांना म्हणे मगोपला मते द्या असा सल्ला देत होते. आता खरे काय आणि खोटे काय हे झरेश्‍वरच जाणे, पण आग लागल्‍याशिवाय धूर निघत नसतो हेही तेवढेच खरे नाही का? एकंदरीत निवडणूक काळातील छुप्या रुस्तमांचा फोंडा शहरात ‘बोलबाला’ दिसतो आहे. ∙∙∙

वजन व मापे खात्याचे फोंडा, उसगावात छापे

वजन व मापे खात्याच्या फोंडा विभागाने दोन दिवसांपूर्वी उसगाव येथे भाजीची, किराणा मालाची दुकाने तसेच दारूची दुकाने अशा २९ ठिकाणी छापे टाकून तिथे वापरली जाणारी अनधिकृत वजने व मापे जप्त केली.

या भागात विकल्या जाणाऱ्या वस्तूमध्ये वजनात फेरफार आढळून येतो अशा तक्रारी आल्यावर ही कारवाई केल्याची माहिती फोंडा विभागाचे निरीक्षक शुबर्ट डिकॉस्ता यांनी दिली. कित्येक ठिकाणी अनधिकृत वजन व मापे वापरण्यात येत असल्याचे यावेळी आढळून आले.