Noida Crime News: उत्तर प्रदेशच्या ग्रेटर नोएडामधील चिपियाना बुजुर्ग येथील सार्वजनिक सुविधा केंद्रात घुसून 30,000 लुटणाऱ्या चार चोरट्यांना बिसरख कोतवाली पोलिसांनी अटक केली आहे. चौघेही एकमेकांचे मित्र आहेत. गोव्याला जाण्यासाठी पैसे नव्हते म्हणून त्यांनी सार्वजनिक सुविधा केंद्रावर दरोडा टाकत लूट केली.

चोरट्यांच्या ताब्यातून 17 हजार रुपये जप्त करण्यात आले आहेत. या दरोड्याच्या नंतर तीन दिवस चोरट्यांचा पाठलाग केल्यानंतर ही घटना उघडकीस आली. दरम्यान, त्यांना न्यायालयात हजर केले असता चारही जणांना पोलिस कोठडी सुनाविण्यात आली आहे.

चारही चोरटे उद्यानात बसून चोरी केलेली रक्कम वाटून घेत होते. तेव्हाच या चोरट्याची माहिती पोलिसांना खबऱ्याकडून मिळाली. पोलिसांनी घटनास्थळी पोहोचून चोरट्यांना जेरबंद केले. पप्पू कुमार, रोहित, आशिष उर्फ ​​विकास आणि चांद अशी अटक करण्यात आलेल्या चोरट्यांची नावे आहेत. अशी माहिती बिसराख कोतवालीचे प्रभारी अनिल राजपूत यांनी दिली.

चार चोरट्यांचे वय 20 ते 18 दरम्यान आहे. या चौघांनीही आठ दिवसांपूर्वी यूट्यूबवर गोव्याचा एक व्हिडिओ पाहिला होता, ज्यामध्ये समुद्राच्या लाटांमध्ये लोक मस्ती करत होते. व्हिडिओ पाहिल्यानंतर चौघांनीही आपणही गोव्याच्या सहलीला जाण्याचा निर्णय घेतला. चौघांकडे पैसे नसल्याने त्यांनी लुटमारीचा कट रचला.

सार्वजनिक सुविधा केंद्र लुटण्यासोबतच बदलापूर येथील महिला रीना हिच्या दुचाकीवरून चोरट्यांनी चेन लुटण्याचाही प्रयत्न केला. महिला दुचाकीवरून पडली, तिलाही दुखापत झाली. मात्र, चोरट्यांना साखळी लुटता आली नाही.

नोएडा येथील निवृत्त आयएएसच्या घरातून 15 लाखांची रोकड चोरीला गेल्याची घटना यापूर्वीही समोर आली आहे. या प्रकरणी त्यांच्या घरात काम करणाऱ्या घरगुती नोकराने 15 लाखांची रोकड आणि लाखोंचे दागिने चोरून पलायन केल्याची माहिती पोलिसांना मिळाली. पोलिसांनी अवघ्या 24 तासांत या प्रकरणाचा पर्दाफाश केला.