Iron Rods Theft in Colvale

म्हापसा: हाऊसिंग-बोर्ड-कोलवाळ येथील हळर्णकर एज्युकेशन सोसायटीच्या बांधकाम साईटवरुन ४०० लोखंडी सळ्या कापून चोरून नेल्याप्रकरणी कोलवाळ पोलिसांनी स्क्रॅपयार्डच्या मालकासह चौघांना अटक केली. पोलिसांनी संशयितांकडून चोरीचा माल हस्तगत केला असून, या सर्वांना म्हापसा न्यायालयाने तीन दिवसांची पोलिस कोठडी सुनावली आहे.

सदर चोरीची घटना सप्टेंबर २०२४ ते ३१ डिसेंबर २०२४ या कालवधीत घडली होती. या चोरीच्या मुद्देमालाची किंमत १.८० लाख रुपये इतकी आहे. अटक केलेल्यांमध्ये स्क्रॅपयार्ड मालक खतालसाब बेपारी (५४), कामगार मंजा लमाणी (३०, म्हापसा, मूळ कर्नाटक), सुरेंद्र जैसवाल (३२, म्हापसा, मूळ उत्तर प्रदेश), शरुन कुमार (२३, कोलवाळ, मूळ उत्तर प्रदेश) यांचा समावेश आहे.

पोलिसांना गोपनीय सूत्रांकडून या चोरीत एक स्क्रॅपयार्ड डिलर सहभागी असल्याचे समजले. त्यानुसार करासवाडा-म्हापसा येथे स्क्रॅपयार्डमध्ये पोलिसांनी झडती घेतली असता, तिथे चोरीचा मुद्देमाल सापडला. याप्रकरणी एज्युकेशन सोसायटीचे प्रतिनिधी नारायण डिचोलकर हे तक्रारदार आहेत.