Charter Plane Arrived in Goa : गोव्यात पावसाळा संपताच पर्यटन हंगामाला सुरुवात झाली आहे. सणासुदीचं निमित्त साधत देशविदेशातील लाखो पर्यटक गोव्यात दाखल होऊ लागले आहेत. राज्यातील जवळपास सर्वच हॉटेल, रिसॉर्ट्स हाऊसफुल्ल झाली आहेत. अशातच पहिलं आंतरराष्ट्रीय चार्टर प्लेनही आज गोव्यात दाखल झालं आहे. (Charter Plane Arrived in Goa)

गोव्याचा यंदाचा पर्यटन हंगाम ऑक्टोबर महिन्यात सुरु होतो. यंदा लांबलेल्या पावसामुळे काहीसा उशिराच पर्यटन हंगाम सुरु झाला आहे. त्यातच आज कझाकस्तानमधून पहिलं चार्टर विमान पर्यटकांना घेऊन गोव्यात दाखल झालं आहे. आज सकाळीच 180 पर्यटक आणि 9 क्रू मेंबर्सना घेऊन हे चार्टर प्लेन दाबोळी आंतरराष्ट्रीय विमानतळावर उतरलं.

मंत्री माविन गुदिन्हो यांनी विमानतळावर जात परदेशी पाहुण्यांचं गोव्यात स्वागत केलं. यावेळी काही अधिकारीही गुदिन्हो यांच्यासह विमानतळावर उपस्थित होते. पारंपरिक ब्रास बँडच्या गजरात पर्यटकांचं स्वागत करण्यात आलं आहे. गोव्यातील पर्यटन हंगाम सुरु झाल्यावर आता दर आठवड्याला एक चार्टर विमान कझाकस्तानहून गोव्यासाठी झेपावणार आहे. यासोबतच चार्टर विमानसेवा पुरवणाऱी कंपनी एरोफ्लॉट आठवड्याला तीन विमानं रशियाहूही सुरु करण्याच्या विचारात आहे. 3 नोव्हेंबरपासून ही विमानसेवाही सुरु होणार आहे.