Fire At Aguada Fort:  गोव्यात मागील महिन्यात सत्तरीपासून ते काणकोणपर्यंतच्या जंगलात आगींच्या घटना घडल्या. या वणव्यांमध्ये मोठ्या प्रमाणात जंगलातील वनसंपदा खाक झाली. राज्य सरकारने व्यापक प्रयत्न करून या आगीच्या घटना आटोक्यात आणल्या. भारतीय वायुसेना देखील यावेळी सरकारच्या मदतीला धावून आली, राज्यातील आगीची नोंद केंद्र सरकारने देखील घेतली.

दरम्यान, आग्वाद किल्ला येथे आग लागली अन् गोवा पोलिसांमुळे मोठा अनर्थ होता होता टळला. याचा एक व्हिडिओ सध्या समोर आला आहे.

गोवा पोलिस पॅट्रोलिंग करत असताना त्यांना आग्वाद किल्ला येथे मोठी आग लागल्याचे निदर्शनास आले. दरम्यान, यावेळी असलेल्या पोलिस कर्मचाऱ्यांनी प्रसंगावधान दाखवत आग विझवण्यासाठी धाव घेतली. पोलिसांनी तात्काळ आगीवर नियंत्रण मिळवले.

यामुळे आगीचा पुढे विस्तार झाला नाही व मोठा अनर्थ टळला. उत्तर गोवा पोलिसांनी पोलिस कर्मचारी आग विझवतानाचा एक व्हिडिओ शेअर केला आहे.

दरम्यान, गोव्यात अलीकडच्या काळात जंगलात आग लागण्याच्या अनेक घटना समोर आल्या होत्या. या आगीमध्ये एकूण जवळपास 4.18 चौरस किलोमीटर वनक्षेत्र खाक झाले आहे.

केंद्रीय पर्यावरण आणि वन राज्यमंत्री अश्विनीकुमार चौबे यांनी गुरुवारी राज्यसभेत खासदार लुइझिन फालेरो यांनी विचारलेल्या प्रश्नाला लेखी उत्तरातून ही माहिती दिली.

गेल्या महिन्यात राज्यभरात जंगलामध्ये आगीच्या 74 घटना घडल्या होत्या. गेल्या महिन्यात राज्यभरातील खाजगी जमीन, राखीव जंगले, कोमुनिदाद जमीन आणि संरक्षित भागात या आगीच्या घटना घडल्या होत्या.

यात तीन वन्यजीव अभयारण्यांमधील 2.27 चौरस किलोमीटर क्षेत्र बाधित झाले होते. त्यासह एकूण सुमारे 4.18 चौरस किलोमीटर वनक्षेत्र आगीत खाक झाले होते.