Pilerne Fire: पिळर्ण औद्यागिक वसाहतीत बर्जर पेंट कंपनीला लागलेल्या आगीमुळे पर्यावरणाची मोठी हानी झाली आहे. संपूर्ण बार्देश तालुक्यावर याचा परिणाम झाला असून सुमारे 2 लाख नागरिकांचा जीव धोक्यात घालण्याचा प्रकार आहे. सरकारने बर्जर पेंट कंपनीवर गुन्हा नोंद करून त्यांच्याकडून 100 कोटी रुपयांचा मोबदला घेतला पाहिजे, अशी मागणी रिव्होलुश्‍नरी गोवन्सचे प्रमुख मनोज परब यांनी केली. पणजी येथे घेतलेल्या पत्रकार परिषदेत ते बोलत होते.

रिव्होलुशनरी गोवन्सने आगीच्या प्रकरणातून काही खबरदारीच्या मागण्या करणारे निवेदन उत्तर गोवा जिल्हाधिकाऱ्यांना दिले आहे. या वेळी सोबत सांतआंद्रेचे आमदार विरेश बोरकर व इतर मान्यवर उपस्थित होते.

मनोज परब म्हणाले की, बर्जर कंपनीला भीष आग लागण्याचे प्रकरण गंभीर स्वरुपाचे असून याची न्यायालयीन चौकशी निवृत्त न्यायमूर्तीच्या अध्यक्षतेखाली झाली पाहिजे. वायू गुणवत्ता तपासण्यासाठी समिती गठित करावी. कंपनीकडून मोबदला घेऊन प्रभावित नागरिकांच्या हितासाठी खर्च केले पाहिजे. पेंटची कंपनी धोकादायक असल्याने कंपनीचे आगचे ऑडिट झाले होते की नाही याची चौकशी होणे आवश्‍यक आहे. या सर्व प्रकारासाठी सरकार जबाबदार आहे.

आगामी विधानसभा अधिवेशनात पिळर्ण औद्योगिक वसाहतीत लागलेल्या भीषण आगसंदर्भात लक्ष्यवेधी सूचना आणि शून्य प्रहरात हा मुद्दा मांडणार आहे. दोषींवर कारवाई होणार की नाही, हे बघावे लागणार आहे. आज राज्यात हफ्ते देऊन आपले बेकायदेशीर व्यवहार केले जात आहे. हे असेच सुरूच राहिल्यास भविष्यात आणखी मोठ्या घटना घडतील, असा इशारा आमदार विरेश बोरकर यांनी दिला.