पणजी: मान्सूनपूर्व तयारीचा भाग म्हणून अन्न व औषध प्रशासन (एफडीए) विभागाने ताळगाव मार्केट, पणजी, कळंगूट, बागा व म्हापसा परिसरात विविध खाद्यपदार्थ विक्री करणाऱ्या ठिकाणांवर तपासणी मोहीम राबवली. एफडीए निर्देशित अधिकारी रिचर्ड नोरोन्हा, तसेच साफिया खान आणि अमित मांद्रेकर यांच्या पथकाने संचालिका श्वेता देसाई यांच्या मार्गदर्शनाखाली ही तपासणी केली.

या मोहिमेचा उद्देश यापूर्वी तपासणी केलेल्या आऊटलेट्सची पुन्हा पाहणी करून नियमांचे पालन केले जाते की नाही, हे तपासणे हा होता. दरम्यान ताळगाव व पणजीतील चार आऊटलेट्सची तपासणी करण्यात आली.

यामध्ये ताळगाव मार्केटमधील ‘बेंगलोर बेकरी’ यांच्यावर १०,००० रुपयांचा दंड ठोठावण्यात आला. कळंगूटमधील आशादुल मुल्ला यांच्या एक आऊटलेटमध्ये नियमांचे पालन न केल्याबद्दल ८,००० रुपयांचा दंड ठोठावला. तसेच दुकान तात्काळ बंद करण्याचे आदेश देखील देण्यात आले.

बागा समुद्रकिनारी स्ट्रीट व्हेंडर्सची देखील तपासणी करण्यात आली. विक्रीसाठी ठेवलेली कापलेली फळे त्वरित नष्ट करण्यात आली. ‘मेसर्स अंबिका कोल्ड ड्रिंक्स’ या आऊटलेटला अत्यंत अस्वच्छ स्थितीत व्यवसाय करत असल्यामुळे बंद करण्याचे निर्देश देण्यात आले.

म्हापसा अलंकार परिसरातील काही विक्रेत्यांची पुन्हा तपासणी करण्यात आली व येत्या मान्सून हंगामाच्या पार्श्वभूमीवर सुधारणा करण्याच्या सूचना देण्यात आल्या.