Mapusa FDA Action : इथेफॉन या घातक रसायनाचा वापर करून पिकवलेली 800 किलो केळी म्हापशात जप्त करून त्याची विल्हेवाट लावण्यात आली. अन्न आणि औषध प्रशासनाने ही कारवाई केली.

प्राप्त माहितीनुसार, एफडीएने ही कारवाई बुधवार, 5 रोजी म्हापसा सबयार्डमध्ये केली. येथील घाऊक दुकानात मगबोद अहमद याने रासायनिक पद्धतीने पिकवलेली सुमारे 8 क्विंटल केळी साठवल्याचे एफडीएला आढळले. संबंधित दुकानदाराने केळी पिकविण्यासाठी इथेफॉन या द्रव्याचा वापर केला होता. हे द्रव्यही जप्त करण्यात आले.

ही केळी जप्त करून म्हापसा पालिकेच्या मुख्याधिकाऱ्यांच्या मदतीने त्यांची विल्हेवाट लावण्यात आली. या नष्ट केलेल्या केळ्यांची किंमत 65 हजार रुपये इतकी आहे. याशिवाय या दुकानातील इतर फळांचे नमुने घेत ते अन्न प्रयोगशाळेत पाठविण्यात आले.

दरम्यान, सोमवारी म्हापसा सबयार्डमधील शेख हनीफ यांच्या दुकानातील केळ्यांचे नमुने घेण्यात आले होते. त्यानुसार, दुकानातील केळी या रासायनिक प्रक्रियेद्वारे या व्यावसायिकाने पिकविल्याचे आढळून आले. अशी केळी खाल्ल्यामुळे लोकांच्या आरोग्यास धोका निर्माण होऊ शकतो.

दुकानदाराविरोधात गुन्हा

कृत्रिमरित्या केळी पिकवल्याप्रकरणी व साठवल्याप्रकरणी दुकानदारविरुद्ध गुन्हा नोंदविण्यात आला असून अन्न सुरक्षा व मानक कायद्यान्वये पुढील कारवाई केली जाईल. या कारवाईत उत्तर गोवा नियुक्त अधिकारी रिचर्ड नोरोन्हा, वरिष्ठ अन्न सुरक्षा अधिकारी राजाराम पाटील, एफएसओ माधव कवळेकर, एफएसओ सोनल गोवेकर व साईनाथ च्यारी यांनी सहभाग घेतला.