Fake Police Dupe Elderly Shopkeeper Snatch 7 Lakh Gold Chain Bicholim

डिचोली: पोलिस अधिकारी असल्याची बतावणी करुन दोन भामट्यांनी डिचोलीतील एका वृद्ध दुकानदाराची सात लाखांची सोनसाखळी हातोहात पळवली. ही घटना बुधवारी (5 मार्च) सकाळी 11 वाजण्याच्या सुमारास शहरातील छत्रपती शिवाजी महाराज मैदानाजवळील सुंदरपेठ रस्त्याच्या जंक्शनवर घडली. दिवसाढवळ्या सदैव गजबजणाऱ्या भागात हा प्रकार घडल्याने खळबळ माजली असून, शहरात 'तोतया' पोलिसांचा वावर असल्याचा संशय वर्तवण्यात येत आहे. भामट्याने गंडवलेल्या दुकानदाराचे नाव सुरेश फळारी असे आहे.

तोतया पोलिसांनी लाटली 7 लाखांची सोनसाखळी

तोतया पोलिसांनी पळवलेल्या सोनसाखळीची किमत जवळपास 7 लाख रुपये असल्याची माहिती मिळाली आहे. सुरेश फळारी हे 11 वाजण्याच्या सुमारास दुकानासमोरील पेट्रोलपंपजवळ लघवी करुन दुकानाकडे येत असताना मोटारसायकलवरुन आलेले दोघेजण त्यांच्यासमोर थांबले. आम्ही पोलिस अधिकारी असून, शहरात सोनसाखळी खेचणारे फिरत आहेत, असे या भामट्यांनी फळारी यांना सांगून त्यांच्या गळ्यातील सोनसाखळी घेवून कागदात बांधून त्यांच्याकडे दिली आणि हे तोतया पोलिस निघून गेले.

अस्नोडातही महिलेला गंडवले

दुकानात आल्यानंतर कागदाची पुडी उघडली असता, सुरेश फळारी यांच्यावर कपाळावर हात मारण्याची पाळी आली. कागदाच्या 'त्या' पुडीत दगड होता. दरम्यान, तत्पूर्वी सकाळी 9 वा. अस्नोडा येथेही अशीच एक घटना घडली आहे. सुजाता गजानन कामत या महिलेची सोनसाखळी लांबवण्याची घटना घडली.

सीसीटिव्ही कॅमेऱ्यात कैद

या घटनेनंतर सुरेश फळारी यांनी डिचोली पोलिस स्थानक गाठून घडलेला प्रकार पोलिसांसमोर सांगितला. याप्रकरणी पोलिसांनी गुन्हा नोंद केला आहे. डिचोली पोलिस याप्रकरणी पुढील तपास करत आहेत.