पणजी: तिसवाडीतील १८ पंचायतीमध्ये अनेक प्रस्थापित तसेच राजकारण्यांच्या नातेवाईकांना धक्के बसण्याबरोबर अनेक प्रभागांमध्ये नवे उमेदवार निवडून आले आहेत. या पंचायतींमध्ये आमदारांचे समर्थन असलेल्या बहुतेक पॅनलला पंचायतींवर वर्चस्व मिळण्याइतपत बाजी मारता आलेली नाही.

(Ex-minister Madkaikar's daughter defeated)

जुने गोवे पंचायतीवर गेली अनेक वर्चस्व असलेल्या माजी मंत्री पांडुरंग मडकईकर यांची मुलगी सुहिरा पां. मडकईकर हिचा प्रभाग ४ मधून पराभूत झाल्याने दणका बसला आहे. सरपंच व उपसरपंचपदासाठी इच्छुक असलेल्या निवडून आलेल्या उमेदवारांमध्ये चढाओढ लागणार आहे. त्यामध्ये स्थानिक आमदारांची भूमिका महत्वाची ठरणार आहे.

या तालुक्यातील संवेदनशील असलेल्या मेरशी, चिंबल व सांताक्रुझ पंचायतीमध्ये अटीतटीच्या लढती झाल्या होत्या. चिंबलचे माजी सरपंच चंद्रकांत कुंकळकर व त्यांचे पुत्र पुंडलिक चंद्रकांत कुंकळकर या दोघांनाही यावेळी मतदारांनी घरी पाठवले. चंद्राकांत कुंकळकर यांना ३९ मतानी हार पत्करावी लागली. मेरशी पंचायतीमध्ये माजी सरंपच व भाजप नेते अनिल होबळे यांच्या पत्नी संध्या अनिल होबळे या निवडून आल्या आहेत. सांताक्रुझमध्ये समविचारी गटाने निवडणूक लढविली होती मात्र त्यातील लुईझा फर्नांडिस व मंगेश गावकर हे निवडून आले. आर्थुर डिसोझा व गटाचे नेते ॲड. आंतोनिओ लॉरेन्सो यांना पराभव पत्करावा लागला. सांत आंद्रे मतदारसंघातून आरजीचे एकमेव निवडून आलेल्या आमदार विरेश बोरकर यांचे समर्थक असलेल्या आझोशी मंडूर पंचायतीवर सातपैकी ४ उमेदवार निवडून आले.